Entoni Blinken Benyamin Netanyahunu “HƏMAS”ın lideri Yahia Sinvarın ölümündən istifadə etməyə və atəşkəs razılaşması üzərində işləməyə çağırıb

 
ABŞ dövlət katibi Entoni Blinken İsrailin Baş naziri Benyamin Netanyahunu “HƏMAS”ın lideri Yahia Sinvarın ölümündən istifadə etməyə, atəşkəs və girovların azad edilməsi razılaşması üzərində işləməyə çağırıb.

Yerusəlimdə keçirilən görüşdə Amerika Birləşmiş Ştatlarının dövlət katibi həmçinin İsrailin Baş nazirini Qəzza sektoruna daha çox humanitar yardım buraxmağa çağırıb. ABŞ-ın xarici idarəsinin rəhbəri münaqişədən sonrakı dövrdə fələstinlilərə öz həyatlarını bərpa etməyə və Qəzzanın idarə edilməsini, təhlükəsizliyini və yenidən qurulmasını təmin etməyə imkan verəcək yeni yol çəkilməsinin vacibliyini müzakirə edib.

Həmçinin, Blinken və Netanyahu Livanda mövcud vəziyyəti və BMT Təhlükəsizlik Şurasının 1701 saylı qətnaməsinin tam icrasını ehtiva edən və sərhədin hər iki tərəfindəki mülki şəxslərin evlərinə qayıtmasına imkan verən Mavi Xətt üzrə diplomatik həllə nail olmaq üçün davam edən səyləri müzakirə ediblər.

“Onlar İran və onun marionetlərinin sonrakı regional təcavüzünün qarşısının alınması zərurətini müzakirə ediblər, o cümlədən ABŞ və onun tərəfdaşlarının davamlı səyini. Dövlət katibi Amerika Birləşmiş Ştatlarının İsrailin təhlükəsizliyinə möhkəm öhdəliyini bir daha təsdiqlədi” – ABŞ Dövlət Departamentinin mətbuat katibi Metyu Miller bildirib.