Enerji resurslarının bahalaşması nəticəsində yaranan inflyasiya təzyiqi fonunda Avropa Mərkəzi Bankı faiz dərəcəsini 2,5 faizə yüksəldib

Avropa Mərkəzi Bankı faiz dərəcəsini 0,25 faiz bəndi artıraraq depozit faizini 2,5 faizə çatdırıb. Bu, son üç ay ərzində faiz dərəcəsinin artıq ikinci dəfə artırılmasıdır.
Mərkəzi Bankın qərarının əsas səbəbi Yaxın Şərqdə, o cümlədən Fars körfəzində müharibə nəticəsində enerji resurslarının bahalaşmasının yaratdığı inflyasiya təzyiqidir.

Avrozonada illik inflyasiya avqust ayında 3,3 faiz təşkil edib. İyul ayında bu göstərici 2,9 faiz olub. Enerji qiymətlərində inflyasiya isə 10,3 faizdən 14,3 faizə yüksəlib. Brent markalı neftin qiyməti də bu gün yenidən 100 dolları ötüb.

Bununla yanaşı, enerji və ərzaq qiymətlərini nəzərə almayan baza inflyasiyası 2,5 faizdən 2,4 faizə enib. Xidmət sektorunda inflyasiya isə 3,3 faizdən 3 faizə düşüb.

Avropa Mərkəzi Bankının proqnozuna görə, inflyasiya bu il orta hesabla 3 faiz, 2027-ci ildə 2,5 faiz, 2028-ci ildə isə 2,1 faiz təşkil edəcək.

Avrozona ölkələrində inflyasiya göstəriciləri əhəmiyyətli dərəcədə fərqlənir. Avqust ayında İspaniyada inflyasiya 4,5 faiz, Almaniyada 2,9 faiz, Fransada isə 2,7 faiz olub.

Avropa Mərkəzi Bankının Prezidenti Kristine Laqard bildirib ki, enerji şokunun inflyasiyaya tam təsiri hələ özünü göstərməyib.

Mərkəzi Bankın qiymətləndirməsinə görə, enerji inflyasiyasındakı son artımın təxminən 90 faizi tələbin artması ilə deyil, enerji təchizatında yaranan problemlərlə bağlıdır.