Fransa yeni təyyarədaşıyan gəmi inşa etməyi planlaşdırır. Prezident Emmanuel Makron bildirib ki, ölkə özünü hərbi-dəniz gücü kimi mövqeləndirmək istədiyi müddətcə, Fransa “ondan qorxulması üçün” güclü olmalıdır.

Yeni təyyarədaşıyan gəmi 2038-ci ildə istifadə müddəti bitməli olan “Şarl de Qoll” gəmisini əvəz edəcək.

Fransa mediasının məlumatına əsasən, yeni nəsil təyyarədaşıyan gəmi proqramının dəyəri təxminən 10.25 milyard avro olacaq. Gəmi 30 qırıcı təyyarə və 2000-ə qədər ekipaj üzvünü daşıya biləcək. Onun uzunluğu 310 metr, eni isə 85 metr olacaq və ölçü baxımından, “Şarl de Qoll”dan üstün olacaq.

Fransa Avropa İttifaqının nüvə silahına malik yeganə ölkəsidir. Təyyarədaşıyan gəmilərə gəlincə, Avropada həmçinin Birləşmiş Krallıq, İtaliya, Rusiya və Türkiyə onlara sahibdir.