Atəşkəs çərçivəsində Ukrayna ərazilərin itirilməsini etiraf edə bilər, bu, beynəlxalq qanunvericiliyə zidd deyil – bu barədə Fransa Prezidenti Emmanuel Makron digər avropalı liderlər və Ukrayna Prezidenti ilə birlikdə Donald Trampla görüşəcəyi Vaşinqtona yola düşməzdən əvvəl deyib.

“Ölkə atəşkəs və ya sülh sazişi çərçivəsində itirdiyi əraziləri, dondurulmuş əraziləri tamamilə etiraf edə bilər. Bu, onların üzərində başqasının suverenliyinin yayıldığını tanımaq deyil, bu əraziləri hərbi nöqteyi-nəzərdən itirdiyinin etirafıdır. Bu, beynəlxalq qanunvericiliyə zidd deyil, lakin bu, çox ciddi güzəştdir. Və sizə dediyim kimi, bu, mənim qərar verəcəyim məsələ deyil. Lakin, 3.5 illik belə münaqişədən sonra, bu qədər insan itkisini nəzərə almaqla, heç bir ölkə əgər onun qalan ərazilərinin müdafiə olunacağına dair zəmanətləri yoxdursa de-fakto olsa belə, ərazi itkisini qəbul edə bilməz” – Emmanuel Makron bildirib.