Eçmiədzin kafedral məbədi Ermənistanda inkişaf edən hadisələrə münasibət bildirir və Araqatsotn yeparxiyasının fəaliyyətinə maneə olan hərəkətləri qanunsuz adlandırır.

“Araqatsotn yeparxiyasının iqamətgahında, Araqatsotn yeparxiyasının baş keşişi və keşişlərinin evlərində axtarış aparılıb. 12 din xadimi, həmçinin Araqatsotn yeparxiyasının mühasibi və katibi saxlanılıb. Bu, Ermənistan hakimiyyətinin sistemli anti-kilsə kampaniyasının növbəti təzahürüdür. Hərəkətlər kilsənin normal fəaliyyətinə əngəl törətmək, onun nüfuzuna xələl gətirmək və din xadimləri, möminlər və geniş ictimaiyyət arasında qorxu yaratmaqla bağlı pis niyyəti açıq-aydın göstərir. Bu qanunsuz hərəkətlər yeparxiyanın fəaliyyətini, dini azadlıq hüququnu kobud şəkildə pozdu və möminlərin hisslərini təhqir etdi” – Eçmiədzin kafedral məbədi tərəfindən yayılmış bəyanatda qeyd olunub.

Bununla yanaşı, kilsə din xadimlərini təxribatlara itaət etməməyə və Erməni Apostol Kilsəsini qətiyyətlə müdafiə etməyə çağırır.

“Heç bir intriqa, təhdid və ya repressiya din xadimləri və möminləri qorxuda bilməz” – bəyanatda qeyd olunub.

Məlumat üçün bildirək ki, Ermənistanda din xadimlərini, o cümlədən Araqatsotn yeparxiyasının baş keşişi, yepiskop Mkrtiç Proşyan və eyni yeparxiyanın beş keşişini saxlayıblar. Yeparxiyanın bir neçə əməkdaşı mülki şəxs həbs edilib. Ermənistanın İstintaq Komitəsinin məlumatına əsasən, din xadimləri toplantıya əngəl olmaq və ya iştirak etməyə məcbur etmək məqsədilə vəzifə səlahiyyətlərindən istifadə etməklə bağlı cinayət işi çərçivəsində saxlanılıblar.

Ermənistan hökuməti ilə Erməni Apostol Kilsəsi arasında münasibət cari ilin yayında iki arxiyepiskopun – Baqrat Qalstanyan və Mikael Acapaxyanın, eləcə də digər şəxslərin kütləvi iğtişaşları qızışdırmaq və hakimiyyəti ələ keçirmək işi çərçivəsində saxlanılmasından sonra gərginləşib. Acapaxyan oktyabrın əvvəlində məhkəmə tərəfindən iki il müddətinə azadlıqdan məhrum edilib.