Dünya liderləri Roma Papasının dünyasını dəyişməsinə münasibət bildirirlər
Pope Francis looks on during his weekly general audience at St Peter's Square in the Vatican, on October 25, 2023. (Photo by Massimo Valicchia/NurPhoto via Getty Images)
Dünya liderləri Roma Papası Fransiskin dünyasını dəyişməsinə münasibət bildirirlər.
ABŞ-nin vitse-prezidenti Cey Di Vens sosial şəbəkədə Papa Fransiskin dünyasını dəyişməsi ilə əlaqədar hüznünü bildirir.
“Papa Fransiskin dünyasını dəyişməsindən indicə xəbər tutdum. Qəlbim dünyada onu sevən milyonlarla xristiana qoşulur. Dünən onu görməyimə sevinmişdim, lakin, açıq-aşkar çox xəstə idi. Onun “Covid” zamanı söylədiyi moizəni hər zaman xatırlayacağam. Həqiqətən çox gözəl idi. Tanrı ruhuna rəhmət etsin” – Cey Di Vens yazır.
Avropa Komissiyasının prezidenti Ursula fon der Laien də Roma Papasının dünyasını dəyişməsi ilə əlaqədar hüznünü bildirir.
“Bu gün dünya Papa Fransiskin dünyasını dəyişməsinə yas tutur. O, təvazökarlığı və ehtiyacı olanlara sevgisi ilə milyonlarla insanı, hətta Katolik Kilsəsindən kənarda da ilhamlandırdı. Düşüncələrim bu böyük itkini hiss edən hər kəslədir. Qoy onlar Papa Fransiskin irsinin hamımızı daha ədalətli, sülh və mərhəmətlə dolu dünyaya doğru istiqamətləndirməyə davam edəcəyi fikrində təsəlli tapsınlar” – Ursula fon der Laien yazır.
Avropa İttifaqının Xarici Siyasət və Təhlükəsizlik Məsələləri üzrə Ali Nümayəndəsi Kaia Kalas bütün katoliklərə başsağlığı verir.
“Həzrətləri Papa Fransiskin dünyasını dəyişməsindən böyük hüzn hissi ilə xəbər tutdum. Biz bu yaxınlarda Romada görüşdük və mən Papa Fransiskə həssas insanların və insan ləyaqətinin müdafiəsində güclü liderliyinə görə təşəkkür etdim. Dünyadakı bütün katoliklərə başsağlığı verirəm” – Kaia Kalas yazır.
Bununla yanaşı, Fransa Prezidenti Emmanuel Makron həyat yoldaşı ilə birlikdə dünyadakı bütün katoliklərə başsağlığı verir.
“Papa Fransisk Buenos-Ayresdən Romaya qədər kilsənin kasıblara sevinc və ümid bəxş etməsini istəyirdi. Qoy o, insanları bir-biri ilə və təbiətlə birləşdirsin. Ümid edirəm bu inam ondan sonra da davam edəcək. Həyat yoldaşım və mən bütün katoliklərə və yas tutan dünyaya başsağlığı veririk” – Makron yazır.
Roma Papası Fransisk 88 yaşında dünyasını dəyişib.