Gürcüstanın futbol yığması 2026-cı ilin Dünya Çempionatının seçmə qrup mərhələsinin ilk qarşılaşmasını Tbilisidə, “Dinamo Arena”da Türkiyənin milli komandası ilə keçirəcək. Oyun saat 20:00-da başlayacaq, birbaşa reportajı isə Gürcüstanın Birinci Kanalı və Birinci Kanal İdman sizə təqdim edəcək.
Gürcüstanın yığması:
2024-cü ilin Avropa Çempionatından sonra 2026-cı ilin Dünya Çempionatı Gürcüstanın yığmasının final mərhələsinə yüksəlməyə çalışacağı ilk böyük turnirdir. Komandamız son rəsmi oyununu mart ayında keçirdi və Millətlər Liqasının B/C divizionunun pley-off mərhələsində Ermənistanın yığmasını Tbilisidə 6:1 hesabı ilə məğlub etdi. Ümumilikdə, Saniolinin komandası Ermənistana 9:1 hesabı ilə qalib gəldi və Millətlər Liqasının B divizionunda yerini qoruyub saxladı. İyunda Tbilisi və Kutaisidə Gürcüstanın yığması yoldaşlıq oyunlarında Farer adaları (1:0) və Kabo-Verde (1:1) ilə qarşılaşdı. Qeyd olunan oyunlarda baş məşqçi oyun vaxtını əsasən gənclərə verdi.
Gürcüstanın iki ən vacib oyunçusu – Qiorqi Çakvetadze və Otar Kiteişvili Türkiyə ilə oyunu buraxacaq, qarşılaşma üçün yığma ilə birlikdə isə üç yeni çağırılmış oyunçu – Qiorqi Abuaşvili, Nodar Lominadze və Qiorqi Kvernadze hazırlaşırdı.
Türkiyənin yığması:
Türkiyənin milli komandası cari ildə Millətlər Liqasının A divizionuna yüksəldi və gələcəkdə Avropa futbolunun ən güclü yığmaları ilə qarşılaşacaq. İtaliyalı mütəxəssis Vinçentso Montellanın çalışdırdığı komanda martda Macarıstana hər iki oyunda qalib gəldi (3:1, 3:0). Bundan sonra türklər yoldaşlıq oyunlarında ABŞ-ni 2:1 hesabı ilə məğlub etdilər, lakin Meksikaya 0:1 hesabı ilə məğlub oldular.
Hazırda Türkiyə öz futbol tarixində ən yaxşı heyətlərindən birinə sahibdir. Montellanın çalışdırdığı komandada bir neçə görkəmli ulduz çıxış edir – Hakan Çalhanoğlu, Arda Güler, Kenan Yıldız, Kerem Aktürkoğlu və başqaları.
Qarşılıqlı görüşlər:
Gürcüstan və Türkiyənin yığmaları sonuncu dəfə 2024-cü ilin Avropa Çempionatında qarşılaşdılar. Bu, Gürcüstanın milli komandasının böyük beynəlxalq turnirin final mərhələsində ilk oyunu idi. Matç türklərin 3:1 hesablı qələbəsi ilə başa çatdı, komandamızın heyətində isə yeganə qolu Qiorqi Mikautadze vurdu, o, Qiorqi Koçoraşvilinin ötürməsindən istifadə etdi.
Ümumilikdə, qonşularımızla futbol meydanında altı dəfə qarşılaşmışıq. Dörd dəfə türklər qalib gəldi, bir görüş heç-heçə başa çatdı, 2007-ci ildə isə Tbilisidə rəqibi Davit Siradzenin vurduğu qolla 1:0 hesabı ilə məğlub etdik. Qeyd olunan matç Türkiyə üçün Gürcüstanın paytaxtında keçirdiyi son oyun idi.
Qarşılaşmanın hakimi:
Gürcüstan – Türkiyə qarşılaşmasını italiyalı hakimlər idarə edəcəklər. Baş hakim Davide Masa olacaq.
Nika Kvekveskirinin yola salınması:
Matçın başlamasına bir neçə dəqiqə qalmış “Dinamo Arena”ya toplaşan azarkeşlər futbol karyerasını başa vuraraq Vili Saniolinin məşqçilər korpusuna keçən Nika Kvekveskirini Gürcüstanın yığmasından yola salacaqlar.
