Gürcüstanın Dövlət Təhlükəsizliyi Xidmətinin Antikorrupsiya Agentliyi tərəfindən Gürcüstanın Prokurorluğu ilə birlikdə görülmüş birgə tədbirlər çərçivəsində, məhkəmənin qərarı əsasında, dövlətə məxsus 403 095 larinin dələduzluq yolu ilə mənimsənilməsi faktı üzrə MMC “Guria Energy”nin direktoru M.J. və nəzarətçi şirkətin əməkdaşı P.R. saxlanılıb. Həmçinin, nəzarətçi şirkətin daha bir əməkdaşı T.M.-yə qarşı ittiham irəli sürüləcək – bu barədə Dövlət Təhlükəsizliyi Xidmətində keçirilmiş brifinqdə bildirilib.
Brifinqdə məlum olduğu kimi, iş külli miqdarda dələduzluq, külli miqdarda dələduzluğa kömək etmək və saxta rəsmi sənədin hazırlanması və istifadəsinə, konkret olaraq, Gürcüstanın Regional İnkişaf və İnfrastruktur Nazirliyinə məxsus külli miqdarda vəsaitin aldadılaraq mənimsənilməsi faktına aiddir.
“Aparılmış istintaqla müəyyən edilib ki, 2022-ci ilin sentyabrından 2023-cü ilin yanvar ayı da daxil olmaqla, Qardabani Munisipalitetində, Norio-Lilonu birləşdirən 3.52 km uzunluğundakı yerli əhəmiyyətli avtomobil yolunun bərpası işlərinin yerinə yetirilməsi prosesində, MMC “Guria Energy”nin 100%-lik səhminin sahibi və direktoru M.J. tenderin icrasına nəzarət və təftiş üçün cavabdeh şəxsin P.R.-nin köməyi ilə saxta rəsmi sənədlər tərtib edib və istifadə etməklə Gürcüstanın Regional İnkişaf və İnfrastruktur Nazirliyinə məxsus 403 095 larini aldadaraq mənimsəyib, bununla dövlətə külli miqdarda maddi ziyan dəyib. Ekspertiza rəyinə əsasən, MMC “Guria Energy” tərəfindən bərpa işləri nəticəsində təhvil verilmiş avtomobil yolu istismara yararsızdır. Qeyd olunan cinayət əməli ilə bağlı istintaq Gürcüstan Cinayət Məcəlləsinin 180-ci maddəsinin 3-cü hissəsinin “b” yarımbəndi, 25 və 180-ci maddənin 3-cü hissəsinin “b” yarımbəndi və 362-ci maddənin 2-ci hissəsinin “b” yarımbəndi üzrə aparılır, bu da cəzanın növü və ölçüsü olaraq 6 ildən 9 ilədək müddətə azadlıqdan məhrum etməni nəzərdə tutur. Brifinq başlamazdan əvvəl media vasitələrinə təqdim etdiyimiz foto materialda bu kimi cinayət əməlinin törədilməsinin hansı nəticələrlə müşaiyət olunacağı əks olunub, bu dövlət tərəfindən heç kimə bağışlanmayacaq. Müvafiq olaraq, bəhsi keçən və digər oxşar kateqoriyalı işlər üzrə cinayətdə iştirak etmiş digər şəxslərin aşkara çıxarılması və korrupsiya faktlarının qarşısının alınması məqsədilə intensiv istintaq davam edir. Dövlət Təhlükəsizliyi Xidməti tərəfindən korrupsiya ilə mübarizə və bu istiqamətdə cinayət əməllərinin aşkara çıxarılması gələcək dövrdə geri dönməz xarakter daşıyacaq və bu barədə ictimaiyyətin məlumatlandırılmasını davamlı şəkildə həyata keçirəcəyik” – DTX-da keçirilən brifinqdə bildiriblər.
