Dövlət büdcəsi layihəsinə əsasən, 2027-ci ildən 70 yaşdan yuxarı şəxslərin pensiyası 60 lari, 70 yaşdan aşağı şəxslərin pensiyası isə 20 lari artırılacaq
Parlament çoxluğunun üzvü Paata Kvijinadzenin sözlərinə görə, 2027-ci ilin dövlət büdcəsi layihəsi inkişafa yönəlib.
“İqtisadi artım 5 faiz, inflyasiya 3 faiz, büdcə kəsiri 2,5 faiz, hökumətin borcu isə 31,6 faiz təşkil edir. Bu göstəricilər həm regionda, həm də Avropada ən yaxşı göstəricilər sırasındadır. Gəlirlər hissəsində icmal büdcə demək olar ki, 2 milyard lari, dövlət büdcəsi isə 1 milyard 200 milyon lari artır. Demək olar ki, bütün nazirliklərə ayrılan vəsait artırılır”, – deyə Kvijinadze bildirib.
Sosial məsələlərə gəlincə, Paata Kvijinadzenin sözlərinə görə, 70 yaşdan yuxarı şəxslərin pensiyası 60 lari artırılaraq 555 lari olacaq. Eyni yaş kateqoriyasından olan və dağlıq ərazilərdə yaşayan şəxslərin pensiyası isə 665 lariyə çatdırılacaq. 70 yaşdan aşağı şəxslərin pensiyası isə 20 lari artırılacaq.
“Eyni nisbətdə artım əlilliyi olan şəxslərə də şamil ediləcək. Hazırda ilkin hesablamalara görə, dövlət sektorunda əməkhaqları 8,4 faiz artacaq”, – deyə Paata Kvijinadze bildirib.
Paata Kvijinadzenin sözlərinə görə, 2027-ci il dövlət büdcəsi layihəsinin parlament komitələrində müzakirəsi oktyabrın 5-dən başlayacaq.
“İxtisaslaşmış komitələr müvafiq nazirliklərlə birlikdə bu məsələləri müzakirə edəcəklər. Müəyyən müddətdən sonra biz irad və təkliflərimizi hazırlayacağıq, nələrin əlavə və ya çıxarıla biləcəyini müəyyənləşdirərək layihəni yenidən işlənmək üçün hökumətə göndərəcəyik. Noyabr ayında yeni variant təqdim olunacaq. Vurğulayıram ki, bu, ilkin büdcə layihəsidir və ikinci və üçüncü oxunuş zamanı artacaq”, – deyə Paata Kvijinadze qeyd edib.