ABŞ Prezidenti Donald Tramp bildirir ki, İsrail və Livan arasında atəşkəs razılaşması üç həftə müddətinə uzadılıb. Onun sözlərinə görə, razılaşmanın uzadılması İsrail və Livanın rəsmi nümayəndələri arasında Oval kabinetdə keçirilən görüşdən sonra qərara alınıb.

Tramp qeyd edib ki, eyni zamanda ABŞ Livana “Hizbullah”a qarşı özünü müdafiə etməkdə kömək edəcək.

Ağ Evin rəhbəri yaxın vaxtlarda Oval kabinetdə İsrailin baş naziri Benyamin Netanyahu və Livanın prezidenti Cozef Aun ilə görüşəcəyinə ümid etdiyini bildirib.

“Amerika Birləşmiş Ştatlarının Prezidenti Donald J. Tramp, ABŞ-ın vitse-prezidenti Cey Di Vens, dövlət katibi Marko Rubio, ABŞ-da İsrailin səfiri Mayk Hakabi və ABŞ-da Livanın səfiri Mişel İssa bu gün Oval kabinetdə İsrail və Livanın yüksək səviyyəli nümayəndələri ilə görüşüblər. Görüş çox yaxşı keçdi! Amerika Birləşmiş Ştatları Livanla birlikdə işləyəcək ki, ona “Hizbullah”a qarşı özünü müdafiə etməkdə kömək etsin. İsrail və Livan arasında atəşkəs razılaşması üç həftə müddətinə uzadılacaq. İsrailin baş naziri Bibi Netanyahu və Livanın prezidenti Cozef Aunu qəbul etməyi səbirsizliklə gözləyirəm. Bu tarixi görüşdə iştirak etmək böyük şərəf idi!”, – deyə Tramp yazıb.

Məlumat üçün bildirək ki, İsrail və Livan arasında atəşkəs razılaşması ilkin olaraq 16 aprel tarixində qüvvəyə minib və 10 gün davam etməli idi, lakin İsrail və “Hizbullah” arasında toqquşmalar davam edib. Tərəflər atəşin açılmasına görə bir-birini günahlandırırlar.