Belarus-də daha 250 siyasi məhbus azadlığa buraxılıb, bunu etdiyinə görə Alexander Lukashenko-ya böyük təşəkkürünü bildirir – bunu Donald Trump sosial şəbəkədə yazıb.

Trump qeyd edir ki, o, “Sülh Şurası”nın növbəti iclasında Lukashenkoyla görüşü səbirsizliklə gözləyir.

“Keçən həftə John Coyle-ın mənim adımla çox hörmətli Alexander Lukashenko-la apardığı danışıqlardan sonra daha 250 siyasi məhbus azad edildi. Beləliklə, ötən ilin may ayından bəri Prezident Lukashenkonun azad etdiyi məhbusların ümumi sayı 500-dən çoxdur. Prezidentə bunun üçün böyük təşəkkürümü bildirirəm. “Sülh Şurası”nın növbəti görüşündə onunla görüşü səbirsizliklə gözləyirəm”, – deyə Trump yazıb.

Qeyd edək ki, 2026-cı ilin mart ayında Belarus hakimiyyəti təxminən 250 məhbusu azad edib. Onlar arasında insan haqları müdafiəçiləri Marfa Rabkova və Nasta Loika var idi. Bundan əvvəl, 2025-ci ilin dekabrında isə Belarusda əlavə 123 məhbus, o cümlədən müxalifətçi Maria Kolesnikava və prezidentliyə sabiq namizəd Viktar Babaryka azad edilmişdi.