Donald Tramp – Ukrayna üçün vəziyyət acınacaqlıdır, Zelenski sülhə sahib ola bilər və ya bütün ölkəni itirənə qədər daha üç il mübarizə apara bilər

Ukrayna üçün vəziyyət acınacaqlıdır, Zelenski sülhə sahib ola bilər və ya bütün ölkəni itirənə qədər daha üç il mübarizə apara bilər – bu barədə ABŞ Prezidenti Donald Tramp “Truth Social” sosial şəbəkəsində yazıb.

Donald Trampın yazdığı kimi, Volodimir Zelenskinin təhrikedici bəyanatları bu müharibənin həllini çətinləşdirir.

“Ukrayna Prezidenti Volodimir Zelenski “Wall Street Journal”ın birinci səhifəsində lovğalanır ki, “Ukrayna Krımın işğalını qanuni olaraq tanımır. Burada danışılası heç nə yoxdur”. Bu bəyanat Rusiya ilə sülh danışıqları üçün çox zərərlidir, çünki Krım uzun illər əvvəl Barak Huseyn Obamanın himayəsi altında itirilib və müzakirə mövzusu deyil.
Heç kim Zelenskidən Krımı Rusiyanın ərazisi kimi tanımasını istəmir, lakin Krımı istəyirsə, niyə 11 il əvvəl güllə atılmadan Rusiyaya veriləndə onun uğrunda mübarizə aparmırdılar? Obamanın “təhvil verməsindən” uzun illər əvvəl bu ərazidə Rusiyanın əhəmiyyətli sualtı bazası yerləşirdi. Zelenskinin təhrikedici bəyanatları bu müharibənin həllini çətinləşdirir. Onun lovğalanacaq heç nəyi yoxdur. Ukrayna üçün vəziyyət acınacaqlıdır – o, sülhə sahib ola bilər və ya bütün ölkəni itirənə qədər daha üç il mübarizə apara bilər. Mənim Rusiya ilə heç bir münasibətim yoxdur, lakin hər həftə orta hesabla səbəbsiz yerə ölən beş min rus və ukraynalı hərbçini xilas etmək arzum var.

Zelenski tərəfindən bu gün verilən bəyanat “Ölüm vadisi”ni uzatmaqdan başqa heç nə gətirməyəcək və bunu heç kim istəmir. Razılaşmaya çox yaxınıq, lakin əlində yaxşı kartı olmayan insan sonda bunu etməlidir. Mən Ukraynaya və Rusiyaya bu tamamilə mütləq bədbəxtçilikdən çıxmağa kömək etməyi səbirsizliklə gözləyirəm, əgər mən prezident olsaydım heç vaxt başlamazdı!” – Tramp yazıb.