ABŞ prezidentinin – Donald Trampın sözlərinə görə, o, ehtimal ki, “Zelenski və Putin arasında görüşü təşkil edib.”

“Mən sanki Putinlə Zelenskinin görüşünü təşkil etdim və qərarı qəbul etməli olan da elə onlardır, çünki biz buradan 7 000 mil uzaqdayıq. Mən prezident Putinlə danışdım və Zelenski ilə görüş barədə razılığa gəlməyə çalışırıq, görək nə olacaq. Əgər alınsa, mən də üçtərəfli görüşə qatılacağam və onu yekunlaşdıracağam”, – Tramp bildirib.

ABŞ prezidenti hesab edir ki, Vladimir Putin və Volodimir Zelenski bir-birini onun düşündüyündən daha yaxşı anlayırlar.

“Məncə, onlar bir-birini mən təsəvvür etdiyimdən daha yaxşı anlayırlar, əks halda, mən bu iki şəxsin görüşünü təşkil etməzdim. Mən üçtərəfli görüş təşkil edərdim, amma düşünürəm ki, işlər daha yaxşı gedir. Ukrayna öz həyatını geri qaytaracaq. Onlar çox torpaq əldə edəcəklər. Bu, müharibə idi və Rusiya güclü hərbi qüvvədir – insanlara xoş gəlsin, ya gəlməsin”, – Tramp deyib.

Bununla yanaşı, Donald Tramp qeyd edib ki, Ukraynaya təhlükəsizlik zəmanətləri çərçivəsində ABŞ hərbi kontingentinin yerləşdirilməsindən söhbət getmir.

O həmçinin vurğulayıb ki, onunla Vladimir Putin arasında münasibətlər daha isti xarakter daşıyır və bu, Ankoric sammitində də hiss olunub. Trampın sözlərinə görə, o, Zelenski və Avropalı liderlərin iştirakı ilə Putinə zəng etməyib, çünki bu, Rusiya liderinə hörmətsizlik olardı.

Donald Tramp həmçinin bildirib ki, o, sülh danışıqlarının sürətləndirilməsinin tərəfdarıdır. ABŞ prezidentinin sözlərinə görə, bəzi Avropa liderləri onun əksinə, tələsmirlər. Tramp əlavə edib ki, Ağ Evdə Avropalı liderləri qəbul edərkən onlardan biri ona gələcək aylar ərzində yenidən görüşməyi tövsiyə edib. Lakin Tramp həmin liderin kim olduğunu dəqiqləşdirməyib.

“Çox yaxşı insan olan cənabların biri – ümid edirəm inciməz – dedi: ‘Gəlin bir-iki ay sonra görüşək.’ Mən cavab verdim ki, bir-iki aya daha 40 000 nəfər həlak olacaq. Bu məsələni bu gecə həll etmək lazımdır və mən də elə etdim. Mən prezident Putinə zəng etdim və Zelenski ilə görüşü razılaşdırmağa çalışıram”, – Tramp deyib.