ABŞ prezidenti Donald Tramp, immiqrasiya ilə bağlı həyata keçirilən əməliyyatlar zamanı etirazçılarla hüquq-mühafizə orqanları arasında baş vermiş qarşıdurmadan sonra Los Ancelesə iki min Milli Qvardiya əsgərinin yerləşdirilməsi barədə qərar verib.

Ağ Evin bəyanatında bildirilir: “Prezident Kaliforniyada qanunsuzluğun qarşısını almaq məqsədi ilə iki min Milli Qvardiya üzvünün yerləşdirilməsi barədə sərəncam imzalayıb”, çünki ştatda immiqrasiya əməliyyatlarına qarşı etiraz aksiyaları davam edir.

“Axırıncı günlərdə zorakı qruplar ABŞ İmmiqrasiya və Gömrük Mühafizəsi zabitlərinə və Kaliforniyada, Los Ancelesdə deportasiya əməliyyatları aparan federal hüquq-mühafizə agentlərinə hücum ediblər. Bu əməliyyatlar ABŞ-ın qeyri-qanuni cinayətkarların ölkəyə daxil olmasının qarşısını almaq üçün həyati əhəmiyyət daşıyır. Bu zorakılıq fonunda Kaliforniyanın məsuliyyətsiz demokrat rəhbərləri vətəndaşların müdafiəsinə dair öhdəliklərini tamamilə yerinə yetirməkdən imtina etdilər. Buna görə də prezident Tramp qanunsuzluqla mübarizə üçün 2000 Milli Qvardiya üzvünün yerləşdirilməsini nəzərdə tutan prezident memorandumu imzaladı,” – deyə Ağ Evin mətbuat katibi Kerolayn Levitt bildirib.

Trampın sərəncamında qeyd olunur ki, hazırkı etirazlar ABŞ hökumətinin səlahiyyətlərinə qarşı “üsyan” formasını alıb.

Müdafiə naziri Pit Hegseth sosial şəbəkə X-də yazıb ki, onun departamenti Los Ancelesdə federal hüquq-mühafizə orqanlarını dəstəkləmək üçün Milli Qvardiyanın dərhal səfərbər edilməsini həyata keçirir və ehtiyac olarsa, əlavə qüvvələr də səfərbər ediləcək.

Kaliforniyada federal immiqrasiya agentləri ilə etirazçılar arasındakı qarşıdurmalar artıq iki gündür davam edir. Qarmaqarışıqlıq, sənədsiz miqrantlara qarşı keçirilən reydlərdən sonra baş verdi. Toqquşmalar Los Anceles şəhərində, eləcə də yaxınlıqdakı Paramount və Compton yaşayış məntəqələrində baş verib. Etirazçılar polisə daş və müxtəlif əşyalar atıblar. Aksiyanın dağıdılması üçün gözyaşardıcı qaz və rezin dəyənəklərdən istifadə olunub. Son iki gün ərzində 118 nəfər saxlanılıb və yaralılar barədə məlumatlar yayılıb.

Şənbə günü daha sonra Los Anceles Polis Departamenti bəyanat yayaraq bildirib ki, şəhərdə etirazlar bu gün sülh şəraitində keçirilib, lakin Paramount və Compton bölgələrində qarışıqlıqlar davam edir.

Öz növbəsində Kaliforniya qubernatoru Tramp administrasiyasının immiqrasiya siyasətini tənqid edib.

“Bütün Kaliforniyada baş verən xaotik federal təmizləmə, özbaşına həbslər üçün kvotaların doldurulmasına yönəlib və bu, məsuliyyətsiz və qəddardır. Donald Trampın yaratdığı xaos inamı sarsıdır, ailələri bir-birindən ayırır və Amerika iqtisadiyyatını dəstəkləyən işçilər və sənayeləri təhlükə altına qoyur,” – deyə Kaliforniya qubernatoru Qevin Nyusomun bəyanatında bildirilir.