Donald Tramp – İlk növbədə, cənub sərhədimizdə fövqəladə vəziyyət elan edəcəyəm, bütün qanunsuz girişlər dərhal dayandırılacaq

 
Bu gün mən mühüm icra sərəncamlarını imzalayacağam, bu hərəkətlərlə Amerikanın tam bərpası və sağlam düşüncə inqilabına başlayacağıq, ilk növbədə, cənub sərhədimizdə fövqəladə vəziyyət elan edəcəyəm, bütün qanunsuz girişlər dərhal dayandırılacaq və milyonlarla cinayətkar əcnəbini gəldikləri yerə qaytarmağa başlayacağıq – bu haqda Amerika Birləşmiş Ştatlarının Prezidenti Donald Tramp bildirib.

Trampın inauqurasiya nitqi ilə çıxış edərkən dediyi kimi, bu, heç kimin görmədiyi səviyyədə ediləcək.

“Biz “Meksikada qal” siyasətimi bərpa edəcəyik. “Tut və burax” praktikasına son qoyacağam və ölkəmizə dağıdıcı axını dayandırmaq üçün cənub sərhədinə qoşun göndərəcəyəm. Həmçinin, bu gün imzalanan əmrlərlə kartelləri xarici terror təşkilatları kimi elan edəcəyik. 1798-ci ilin Əcnəbi Düşmənlər Aktından istifadə etməklə, hökumətimizə ABŞ ərazisində, o cümlədən şəhərlərimizdə və daxili rayonlarımızda dağıdıcı cinayətlər törədən bütün xarici dəstələri və cinayət şəbəkələrini sıradan çıxarmaq üçün federal və ştatların hüquq-mühafizə orqanlarının tam və nəhəng gücündən istifadə etməyə dair göstəriş verəcəyəm. Ali Baş Komandan kimi ölkəmizi təhlükələrdən və axınlardan qorumaqdan daha yüksək məsuliyyətim yoxdur. Məhz bunu edəcəyəm. Biz bunu heç kimin görmədiyi səviyyədə edəcəyik. Sonra kabinetimin bütün üzvlərinə rekord inflyasiyaya qalib gəlmək, xərcləri və qiymətləri sürətlə aşağı salmaq üçün əllərində olan geniş səlahiyyətlərdən istifadə etmələri üçün göstəriş verəcəyəm. İnflyasiya böhranı enerjinin kütləvi şəkildə həddən artıq xərclənməsi və qiymətlərin artması nəticəsində yaranıb, buna görə də bu gün mən milli enerji fövqəladə vəziyyəti elan edəcəyəm. Biz qazacağıq” – Tramp bildirib.