ABŞ prezidenti Donald Tramp Vaşinqtonda Milli Qvardiyanın iki əsgərinin yaralanmasından sonra bildirib ki, hücum edən şəxs Əfqanıstan vətəndaşıdır və Əfqanıstandan ölkəyə daxil olmuş bütün miqrantların yenidən yoxlanmasını tələb edib.

Donald Tramp hücumu “şər, nifrət və terror aktı” kimi qiymətləndirib və qeyd edib ki, “bu, millətə və bəşəriyyətə qarşı bir cinayət idi”.

“ABŞ prezidenti olaraq, qəti şəkildə qərara almışam ki, bu vəhşiliyi törədən vəhşi ən ağır cəzanı alsın,” – deyə Donald Tramp bildirib.

ABŞ prezidentinin sözlərinə görə, Təhlükəsizlik Departamenti əmindir ki, saxlanılan şübhəli 2021-ci ilin sentyabrında Əfqanıstandan ölkəyə daxil olmuş əcnəbidir.

“Baidən dövründə Əfqanıstandan ölkəyə daxil olan bütün əcnəbiləri yenidən yoxlamalıyıq. Burada yeri olmayan və ya ölkəyə heç bir fayda gətirməyən hər bir əcnəbini ölkədən çıxarmaq üçün bütün lazımi tədbirləri görməliyik,” – deyə Donald Tramp bildirib.

Bununla yanaşı, onun sözlərinə görə, paytaxtın müdafiəsi üçün hərbi departamentə əlavə 500 əsgərin səfərbər edilməsini tapşırıb.

Məlumat üçün, Ağ Evin yaxınlığında Milli Qvardiyanın iki əsgəri atəşli silahla yaralanıb. Polis bildirir ki, şübhəli saxlanılıb. Federal Təhqiqat Bürosunun rəhbəri Kaş Patel deyib ki, yaralanmış əsgərlərin vəziyyəti kritikdir. Vaşinqton Polis Departamentinin nümayəndəsi Cefri Kerol isə bildirib ki, şübhəli də yaralanıb və xəstəxanaya yerləşdirilib. Hücumun motivi hələlik məlum deyil. ABŞ prezidenti Donald Tramp atışma zamanı Floridada olub.