Dmitro Kuleba – Səfərbərlik yaşının 18-ə endirilməsinə sevinəcək yeganə insan 18 yaşında olan oğlumdur və mən onu universitetdə təhsilini davam etdirməyə çətinliklə inandırdım

 
Ukraynanın sabiq xarici işlər naziri Dmitro Kuleba “BBC”yə müsahibəsində səfərbərlik yaşının mümkün azaldılması məsələsini və oğlunun hərbi xidmətə çağırılmasına dair şəxsi münasibətini müzakirə edib.

Kuleba bildirib ki, mövcud narahatlıqlara baxmayaraq, səfərbərlik yaşının 25-dən 18-ə endirilməsi ehtimalı azdır.

“Bu dəyişikliyin səsləndiyi qədər dramatik olacağını düşünmürəm. Mən başa düşə bilmirəm ki, niyə yaş birbaşa 18-ə endirilməlidir” – Dmitro Kuleba bildirib.

Ukraynanın sabiq xarici işlər nazirinin fikrinə görə, belə bir qərar qəbul etməzdən əvvəl generallar siyasi rəhbərliyə, parlamentə və ən əsası isə Ukrayna xalqına arqumentlər təqdim etməlidirlər.

“Bu, Ukrayna cəmiyyətinin heç bir hissəsinin müsbət qarşılamayacağı çox ağrılı qərar olacaq” – Kuleba qeyd edib.

Kuleba müsahibəsində hərbi təlim keçən 18 yaşlı oğlunun ölkəsi uğrunda döyüşməyə hazır olduğunu bildirib.

“Düşünürəm ki, yaş 18-ə endirilsə, sevinəcək yeganə insan 18 yaşında olan oğlumdur. Mən onu universitetdə təhsilini davam etdirməyə çətinliklə inandırdım” – Ukraynanın sabiq xarici işlər naziri bildirib.

Oğlunun cəbhəyə getməsinə necə münasibət bəsləyəcəyi sualına Kuleba cavab verib: “Onun qərarına hörmətlə yanaşıram. Fikrimcə, bu, can atmalı olduğunuz bir şey deyil, amma sənin vaxtın yetişəndə, çağırışı ləyaqətlə qarşılamalısan”.

Həmçinin, Kuleba qeyd edib ki, məqsədi övladlarına öz fikirlərini təlqin edən ata olmaq deyil.

“Onun 18 yaşı var və qərar qəbul edə bilir. Xahiş etdiyim tək şey universiteti bitirməsidir, çünki cəbhə xəttindən qayıtdıqdan sonra təhsili başa vurmaq çox çətin olacaq” – Kuleba qeyd edib.