Dmitri Peskov Litva Seyminin qanunvericiliyə planlaşdırılan dəyişikliklə bağlı qərarını „eskalasiyaya doğru çox ciddi addım“ adlandırıb. Söhbət nüvə silahlarının yerləşdirilməsinə qoyulan qadağanın aradan qaldırılmasını nəzərdə tutan dəyişiklikdən gedir

„Hər hansı ərazidə bizə qarşı nüvə silahı yerləşdirilərsə, müvafiq olaraq həmin ölkənin ərazisi bizim nüvə silahlarımız üçün hədəfə çevriləcək“. Bu barədə Kremlin mətbuat katibi Dmitri Peskov Litva Seyminin ölkə ərazisində nüvə silahlarının yerləşdirilməsinə qoyulan qadağanın aradan qaldırılmasını nəzərdə tutan qanun dəyişikliyi ilə bağlı açıqlama verib. Məlumatı „İnterfaks“ yayıb.
Peskovun sözlərinə görə, bu addım „eskalasiya və gərginlik baxımından çox ciddi“ olacaq.

„Öz ərazinizdə nüvə silahı yerləşdirirsinizsə, bu silah kiməsə qarşı yönəlmiş olacaq. Aydındır ki, bu silah Qərbə qarşı yönəlməyəcək, Şərqə, yəni bizə qarşı yönələcək“, – Peskov qeyd edib.

Litvanın ictimai yayımçısının məlumatına görə, Litva Seymi qış aylarında Konstitusiyaya dəyişiklik qəbul etməyi planlaşdırır. Dəyişikliyə əsasən, ölkənin əsas qanunundan öz ərazisində kütləvi qırğın silahlarının yerləşdirilməsini qadağan edən müddəa çıxarılacaq. Bunun üçün Seymin payız sessiyasının uzadılması tələb olunacaq. Layihəni Seymin Hüquq və Qaydalar Komitəsi dəstəkləyib.