Kreml bildirir ki, Rusiya Prezidenti Vladimir Putin Avropa İttifaqı ilə danışıqlara hazırdır, lakin bu istiqamətdə ilk addımı atmayacaq.

Kremlin sözçüsü Dmitri Peskov deyib ki, ilk addımı Avropa ölkələri atmalıdır, çünki 2022-ci ildə Moskva ilə əlaqəni məhz onlar kəsmişdi.

“Putin hər kəslə danışıqlara hazırdır. Bu barədə o, dəfələrlə bildirib. Biz dialoqa irəli getməyə hazır olacağıq, o qədər ki, avropalılar buna hazır olacaqlar. Lakin, Putinin dəfələrlə qeyd etdiyi kimi, biz belə bir əlaqənin təşəbbüskarı olmayacağıq, avropalıların mövqeyinə əsaslanaraq,” – deyə Kreml sözçüsü bildirib.

Eyni zamanda, Peskov bildirib ki, Rusiya tərəfi Avropa İttifaqı ilə münasibətlərin tamamilə dayandırılmasının təşəbbüskarı olmayıb və bu addımlar Brüsseldən və ayrı-ayrı Avropa paytaxtlarından başlayıb.

Qeyd edək ki, bundan əvvəl “Financial Times” yayımlamışdı ki, Avropa İttifaqının liderləri Rusiya Prezidenti ilə potensial danışıqlara hazırlaşırdılar.