Dimitri Peskovun həyat yoldaşı ona qarşı tətbiq edilən sanksiyalara görə Avropa İttifaqı Məhkəməsində iddia qaldırıb

Kremlin mətbuat katibi Dimitri Peskovun həyat yoldaşı Tatyana Navka Avropa İttifaqı tərəfindən ona qarşı tətbiq edilən sanksiyalara görə məhkəmədə iddia qaldırıb.

Avropa İttifaqı Tatyana Navkanı sanksiya siyahısına 2022-ci ilin iyun ayında daxil edib, həmin siyahıya Peskovun övladları da düşüb. Brüsseldə o zaman sanksiyaların, o cümlədən Avropa İttifaqına giriş qadağası və maliyyə məhdudiyyətlərinin Ukraynanın ərazi bütövlüyünə, suverenliyinə və müstəqilliyinə qarşı yönəlmiş əməllərə görə tətbiq olunduğunu bəyan etmişdilər.

Tatyana Navka iddia ərizəsində iddia edir ki, məhdudiyyətlərin əsasları lazımi qaydada formalaşdırılmayıb, hüququn tətbiqi və faktiki halların qiymətləndirilməsində səhvlərə yol verilib, Avropa İttifaqı isə onunla sanksiyaların məqsədi arasında kifayət qədər əlaqə olduğunu sübut edə bilməyib.

İddia ərizəsinə əsasən, Kremlin mətbuat katibinin həyat yoldaşı Avropa İttifaqı Şurasından maddi və nüfuz zərərinin ödənilməsini tələb edir, bu da ümumilikdə təxminən iki milyon avro təşkil edir.

Medianın yazdığı kimi, Avropa İttifaqının rəsmi məlumat bazasına əsasən, Rusiya Dövlət Müdafiə Sənayesi Korporasiyası “Rostex”in rəhbəri Serqey Çemezovun həyat yoldaşı Ekaterina İqnatova da eyni hüquqi yolla sanksiyaların ləğv edilməsinə çalışır.