Rusiya Ermənistan və Azərbaycanla münasibətləri inkişaf etdirməyi planlaşdırır – bu haqda Kremlin mətbuat katibi Dimitri Peskov ABŞ-nin vitse-prezidenti Cei Di Vensin Azərbaycan və Ermənistana səfəri haqqında danışarkən deyib.

Peskov bildirib ki, Rusiyanın Ermənistan və Azərbaycanla demək olar ki, bütün sahələrdə faydalı əməkdaşlığı var və Moskva bu əməkdaşlığı davam etdirməyi planlaşdırır.

“Bizim Bakı, eləcə də Yerevanla bütün mümkün sahələri əhatə edən ikitərəfli münasibətlərimizin geniş spektri var. Bu qarşılıqlı faydalı ticarət-iqtisadi əməkdaşlığı, ikitərəfli investisiyalar və mədəni əlaqələri əhatə edir. Əlbəttə, biz bu münasibətləri tərəfdaşlarımızla təkcə bizim üçün deyil, həm də onlar üçün qarşılıqlı faydalı olacaq şəkildə inkişaf etdirmək niyyətindəyik” – Peskov bildirib.

Peskov bildirib ki, Ermənistan və Azərbaycan suveren dövlətlərdir və müvafiq olaraq, Amerika Birləşmiş Ştatları da daxil olmaqla istənilən ölkə ilə münasibətlər qurmaq üçün tam hüquqa malikdirlər. Bununla yanaşı, Kremlin mətbuat katibi qeyd edib ki, Avrasiya İqtisadi İttifaqının Ermənistanın sürətli iqtisadi inkişafında rolu göz qabağındadır və Rusiya təşkilat çərçivəsində Ermənistanla əməkdaşlığın davam edəcəyinə ümid edir.