Kremlin mətbuat katibi Dimitri Peskov bildirib ki, Rusiya və Ukrayna tərəfləri əsirlərin tez bir zamanda dəyişdirilməsində maraqlıdırlar. Lakin o qeyd edib ki, proses çətindir, çünki konkret insanların adları üzrə razılığa gəlmək lazımdır.

Jurnalistin Rusiya ilə Ukrayna arasında əsir mübadiləsinin bu həftə gözlənilib-gözlənilməməsi ilə bağlı sualına Peskov prosesin zəhmətli olduğunu və müəyyən vaxt tələb etdiyini qeyd edib.

“Bu, olduqca zəhmət tələb edən məsələdir. Təbii ki, konkret adların mübadiləsi üzərində iş aparılır, çünki söhbət min əsirin min əsirlə dəyişdirilməsindən gedir və bu da müəyyən vaxt tələb edir. Bu iş davam edir, lakin bir daha təkrar edirəm – kifayət qədər operativ şəkildə” – Peskov bildirib.

Məlumat üçün bildirək ki, Ukrayna və Rusiya tərəfləri 2022-ci ildən sonra Rusiya və Ukrayna arasında ilk üzbəüz danışıqlar olan İstanbulda keçirilən danışıqlar zamanı hərbi əsirlərin mübadiləsi məsələsini razılaşdırıblar.