Denis Şmiqal müvafiq xidmətlərə bütün güclü generatorları işıqsız qalan Odessaya göndərməyi tapşırdı

Ukraynanın baş naziri, Denis Şmiqal müvafiq xidmətlərə bütün güclü generatorları işıqsız qalan Odessaya göndərməyi tapşırdı. Energetika Nazirliyinə məxsus generatorlar şəhərə bir gün ərzində gətirilməlidir.

Şmiqal Teleram kanalında yazdığı kimi, o, həmçinin Xarici İşlər Nazirliyinə Türkiyədən üzən elektrik stansiyaları ilə bağlı əlavə dəstək istəməyi tapşırdı.

Milli enerji şirkətinin “Ukrenerqo” yarımstansiyasında bu gün səhər saatlarında baş vermiş qəzaya görə, Odessaya elektrik enerjisinin çatdırılması dayandırlıb. Şmiqalın məlumatına görə, qeyd olunan stansiya rus hücumu nəticəsində dəfələrlə zədələndi. Sosial şəbəkələrdə yayılan məlumata görə, şənbə günü səhər Odessa şəhərinin kənarında yerləşən “Usatovo” yarımstansiyasında yanğın baş verdi.

Baş nazirin məlumatına görə, ilk növbədə enerji ilə kritik əhəmiyyətli infrastruktur obyektləri və çoxmənzilli binalar  təmin olunacaq.