Daur Buavanı təhlükədə ikən tərk etmə faktı üzrə saxlanılan Valeriya Kirliuk barəsində həbs qətimkan tədbiri seçilib

Abxaz bloger Daur Buavanı təhlükədə ikən tərk etmə faktı üzrə saxlanılan ukraynalı qadın Valeriya Kirliuk barəsində həbs qətimkan tədbiri seçilib. Qeyd olunan qərarı Tbilisi Şəhər Məhkəməsinin hakimi Arsen Kalatozişvili qəbul edib.

Prosesdə təqsirləndirilən şəxsin özü iştirak etməyib. Vəkilin verdiyi məlumata əsasən, o, bu vaxta qədər “Vivamed” klinikasında, reanimasiya şöbəsində müalicə kursu keçir.

Qətimkan tədbiri kimi həbsin seçilməsini ittiham tərəfi tələb edib və arqument kimi təqsirləndirilən şəxs tərəfindən qaçma, sübutları məhv etmə və yenidən cinayət törətmə təhlükəsini göstərib. Həmçinin prokuror, təqsirləndirilən şəxsin mənzili tərk etdikdən iki gün sonra belə mənzildə köməksiz vəziyyətdə qalan Daur Buava haqqında heç kəsə xəbər vermədiyini bildirib.

Müdafiə tərəfi ən ağır qətimkan tədbirinin seçilməsi ilə razılaşmayıb. Vəkilin verdiyi məlumata əsasən, təqsirləndirilən şəxs bu vaxtadək reanimasiya şöbəsində qalır və o, məhkəməni bu halı nəzərə almağa çağırıb. Təqsirləndirilən Ukrayna vətəndaşı bu vaxta qədər susmaq hüququndan istifadə edir.

Məlumat üçün bildirək ki, abxaz bloger Daur Buavanı Tbilisidə mənzilində avqustun 28-də ölmüş halda tapıblar. Avqustun 29-da hüquq-mühafizə orqanlarının əməkdaşları xarici ölkə vətəndaşı, Daur Buavanın dostu Valeriya Kirliuku Cinayət Məcəlləsinin 128-ci maddəsi ilə saxlayıblar, bu da təhlükədə ikən tərk etməni nəzərdə tutur. İstintaqın məlumatına əsasən, onlar narkotik vasitə qəbul ediblər, bundan sonra hər ikisinin halı pisləşib. Onların məlumatına əsasən, saxlanılan qadın kritik dərəcədə ağır və həyatı üçün təhlükəli vəziyyətdə olan Buavanı tərk edib, mənzilin qapısını çöldən bağlayaraq hadisə yerindən gedib. Həmçinin, istintaq Cinayət Məcəlləsinin 115-ci – özünü öldürmə həddinə çatdırma maddəsi ilə də aparılır. Hüquq-mühafizə orqanlarının əməkdaşları Daur Buavanın ölümü faktı üzrə istintaq çərçivəsində narkotik vasitələrin əldə edilməsi və saxlanılması ittihamı ilə iki nəfəri saxlayıblar.