Ceyhun Bayramov – Azərbaycan və Ermənistan sərhədinin delimitasiyası prosesinin Azərbaycan, Ermənistan və Gürcüstan sərhədlərinin kəsişdiyi nöqtədən başlanması barədə razılıq əldə olunub

Azərbaycanın xarici işlər naziri Ceyhun Bayramovun sözlərinə görə, Azərbaycan və Ermənistan dövlət sərhədinin delimitasiyası prosesinin Azərbaycan, Ermənistan və Gürcüstan sərhədlərinin kəsişdiyi nöqtədən başlanması barədə razılıq əldə olunub.
Ceyhun Bayramov bu barədə jurnalistlərə “Bakı İqlim Dəyişikliyinə Qarşı Mübarizə Həftəsi” çərçivəsində keçirilən tədbirdə bildirib.

Onun sözlərinə görə, sərhədin delimitasiyası məsələsi üzrə dövlət komissiyasında Azərbaycan nümayəndə heyətinin tərkibi dəyişməyib və komissiyaya baş nazirin müavini Şahin Mustafayev rəhbərlik edir.

Onun sözlərinə görə, ötən müddət ərzində iki ölkənin komissiyaları arasında bir sıra görüşlər keçirilib, Azərbaycan və Ermənistanda komissiyaların fəaliyyətini tənzimləyən bir sıra sənədlər qəbul və təsdiq edilib.

“Ümumi sərhədimizin delimitasiyasının hansı istiqamətdə aparılacağı ilə bağlı razılıq əldə olunub. Həmçinin işlərin şimaldan cənuba doğru aparılması və irəlilədilməsi, ən mürəkkəb olan şimal hissəsindən – Azərbaycan, Ermənistan və Gürcüstan sərhədlərinin kəsişdiyi nöqtədən başlanması barədə razılıq və qarşılıqlı anlaşma mövcuddur”, – deyə nazir bildirib.

Bayramov qeyd edib ki, daha konkret məsələlər delimitasiya komissiyalarının işi çərçivəsində müzakirə ediləcək və həll olunacaq.