Britaniyanın “Telegraph” nəşri Gürcüstanın turizm potensialı haqqında məqalələr dərc edir

Gürcüstan İqtisadiyyat və Davamlı İnkişaf Nazirliyinin Turizm üzrə Milli Administrasiyasının məlumatına görə, nüfuzlu Britaniya nəşri “Telegraph” Gürcüstanın turizm potensialı ilə bağlı məqalələr silsiləsi dərc edir.
Turizm üzrə Milli Administrasiyanın bildirdiyinə görə, Gürcüstan macəra turizmi həvəskarları üçün Avropanın ən maraqlı istiqamətlərindən biri hesab olunur.
Məlumata əsasən, Turizm üzrə Milli Administrasiya British Airways ilə əməkdaşlıq çərçivəsində Böyük Britaniyada marketinq kampaniyası həyata keçirir. Kampaniya çərçivəsində Böyük Britaniyanın nüfuzlu onlayn nəşri Telegraph.co.uk saytında Gürcüstanın turizm potensialı haqqında geniş reklam-məlumat xarakterli məqalələr silsiləsi yayımlanıb.
“Gürcüstanda aktiv istirahətdən necə zövq almaq olar” adlı məqalədə qeyd olunur ki, ölkənin təsirli landşaft müxtəlifliyi, Qara dəniz sahillərinin gözəl çimərlikləri, sıx meşələri, dərələri və Qafqaz zirvələri Gürcüstanı aktiv istirahət üçün ideal məkana çevirir. Burada dünya səviyyəli piyada yürüşləri ilə yanaşı, velosiped idmanı, raftinq və xizək idmanı imkanları da mövcuddur.
Bundan əlavə, “Avropanın ən fərqli paytaxtını necə kəşf etmək olar” adlı məqalədə britaniyalı səyahətçilərə Tbilisidə qısamüddətli səfərlərin planlaşdırılması ilə bağlı tövsiyələr təqdim olunur.
“Telegraph” yazır ki, “Tbilisi qədim və müasirliyin, Şərq və Qərbin cəlbedici qarışığıdır. Burada orta əsrlərə aid səssiz məbədlər müasir memarlıq möcüzələri ilə rəqabət aparır”. Nəşr qeyd edir ki, British Airways-in Gürcüstanın fərqli xüsusiyyətləri ilə seçilən paytaxtına birbaşa reysləri bu cür qısa səfərləri daha da cəlbedici edib.
“Dadmaq istəyəcəyiniz kulinariya istiqaməti” adlı məqalədə isə gürcü qastronomiyasına, kvevri şərabının 8 min illik ənənəsinə, milli yeməklərə – xaçapuri, xinkali, pkhali, tkemali və süfrə mədəniyyətinə diqqət yetirilir.
Məqalədə vurğulanır ki, gürcü mətbəxi ölkəyə səfərin əsas səbəblərindən biri hesab olunur və britaniyalı turistlər üçün yerli dadları kəşf etmək məqsədilə bələdçi rolunu oynayır. Müəllif Rudolf Abraham qeyd edir ki, zəngin kulinariya irsi və dünyanın ən qədim şərabçılıq tarixlərindən biri ilə Gürcüstan yeməklərin həm sənət, həm də sosial ritual olduğu bir məkandır.
Böyük Britaniyada həyata keçirilən Turizm üzrə Milli Administrasiyanın marketinq kampaniyasının məqsədi Gürcüstanı Britaniya bazarında müxtəlif və rəqabətqabiliyyətli turizm istiqaməti kimi tanıtmaqdır.
Kampaniya British Airways ilə tərəfdaşlıq çərçivəsində rəqəmsal fəaliyyətləri, banner reklamlarını, reklam məqalələrini, digər inteqrasiya olunmuş marketinq tədbirlərini, eləcə də aparıcı onlayn media platformalarında birgə brendli məzmunların yayımlanmasını əhatə edir.
Məlumatı Gürcüstanın Turizm üzrə Milli Administrasiyası yayıb.