Böyük Britaniya bəyan edib ki, Suriya ilə diplomatik münasibətləri bərpa edəcək.

Böyük Britaniyanın xarici işlər naziri Devid Lemi Dəməşqə səfər edib və Suriya xalqına 94.5 milyon funt sterlinq dəyərində yardım vəd edib.

Bu, son 14 il ərzində Böyük Britaniyanın xarici işlər nazirinin Suriyaya ilk səfəridir.

Böyük Britaniya bu ilin aprel ayında Suriyaya qarşı sanksiyaları yumşaldıb. Xüsusilə, investisiyaları təşviq etmək məqsədilə Suriyanın Mərkəzi Bankına və daha 23 təşkilata aid dondurulmuş aktivlər geri qaytarılıb. Lakin Bəşər Əl-Əsədin rejiminin üzvlərinə qarşı sanksiyalar hələ də qüvvədədir.

Lemi həmçinin Küveytə də səfər edəcək və orada regional təhlükəsizlik məsələlərini və iki ölkə arasındakı münasibətlərin gücləndirilməsini müzakirə edəcək.

Devid Lemi mediaya verdiyi açıqlamada bu səfərin tarixi əhəmiyyətindən danışıb və qeyd edib ki, Böyük Britaniya hər zaman Suriyanın xalqını humanitar yardımlarla dəstəkləyib. Eyni zamanda, Lemi yeni hökuməti inklüzivliyi və şəffaflığı qoruyub saxlamağa çağırıb.