Böyük Britaniyada hərbi helikopterin qəzaya uğraması nəticəsində üç hərbi qulluqçu həlak olub. Bu barədə “BBC” yazır.

Böyük Britaniya Kral Hərbi Dəniz Donanmasına məxsus helikopter ölkənin cənub-qərbində, Devon qraflığında yerləşən tarlaya düşüb.

Kral Donanmasının verdiyi məlumata əsasən, hadisə yerli vaxtla təxminən saat 04:00-da baş verib.

“Həlak olanların ailələrinə faciə barədə artıq məlumat verilib. Onlar əlavə təfərrüatlar ictimaiyyətə açıqlanana qədər zaman və şəxsi məxfilik istəyiblər” – qurumun bəyanatında deyilir.

Böyük Britaniyanın Baş naziri Kir Starmer baş verənləri “son dərəcə faciəvi” adlandırıb və həlak olanların ailələrinə başsağlığı verib.

Helikopterin qəzaya uğrama səbəbi hələlik məlum deyil. İstintaq aparılır.