Böyük Britaniya ukraynalı uşaqların qeyri-qanuni deportasiyası və Ermənistanın gələcək parlament seçkilərinə müdaxiləyə görə Rusiyaya qarşı sanksiyalar tətbiq edib – bu haqda bəyanatı Böyük Britaniya hökuməti yayır.

Bəyanatda deyilir ki, bu sanksiyalar paketi Böyük Britaniyanın Rusiyanın düşmənçilik hərəkətlərinə qarşı mübarizə aparmaq üçün gördüyü ən sərt tədbirlərdən biridir.

Xüsusilə, Böyük Britaniya ukraynalı uşaqların məcburi deportasiyasında iştirak edən 85 fiziki və hüquqi şəxsə qarşı sanksiyalar tətbiq edib.

Bəyanata əsasən, Böyük Britaniya “Social Design Agency”də (SDA) çalışan 49 nəfərə, xüsusilə “Kremlin təbliğatına görə məsuliyyət daşıyan müəlliflərə, tərcüməçilərə və rejissorlara” qarşı sanksiyalar tətbiq edib.

“Kremlin tapşırığı ilə SDA Ermənistanda rusyönümlü təşkilatların yaradılması və hakimiyyət dəyişikliyinə rusyönümlü şəxslərin xeyrinə təsir göstərmək məqsədilə kampaniyalar planlaşdırıb” – Böyük Britaniya hökumətinin bəyanatında qeyd olunub.

Bununla yanaşı, Böyük Britaniya Rusiyanın “Gənclərin Hərbi-İdman Təhsili və Vətənpərvərlik Təhsili Mərkəzi”nə “Ukraynalı uşaqların ruslaşdırılması kimi dəhşətli siyasətdə” roluna görə sanksiyalar tətbiq edib.

Böyük Britaniyanın xarici işlər naziri İvet Kuperin bəyanatına əsasən, Böyük Britaniyanın Ukraynaya dəstəyi sarsılmaz olaraq qalır.

“Putin xaricdə yalan və Kremli dəstəkləyən narrativlər səpməyə çalışdıqca, Böyük Britaniya hərəkətsiz qalmayacaq. Ukraynaya olan dəstəyimiz sarsılmazdır. Ailələrindən vəhşicəsinə qoparılmış uşaqların müəyyən edilməsi və tapılması istiqamətindəki bütün səyləri dəstəkləmək üçün müttəfiqlərimizlə birlikdə işləməyə davam edəcəyik” – Kuper bildirib.