Boris Pistorius bildirib ki, Almaniya öz ehtiyatlarından Ukraynaya əlavə „Patriot“ raketləri göndərəcək

Almaniyanın müdafiə naziri Boris Pistorius bildirib ki, Almaniya öz ehtiyatlarından Ukraynaya əlavə „Patriot“ raketləri göndərəcək.
Onun sözlərinə görə, qışın yaxınlaşması ilə Rusiyanın Ukraynanın infrastrukturuna hava hücumlarını gücləndirəcəyi gözlənilir.

„Rusiya cəbhə xəttində çox yavaş irəlilədiyi üçün hava hücumları vasitəsilə Ukraynanın iqtisadi təməlini və kritik infrastrukturunu, o cümlədən limanları, elektrik stansiyalarını və digər mülki obyektləri məhv etməyə çalışır“, – Pistorius bildirib.

Onun sözlərinə görə, qışın yaxınlaşması ilə Rusiyanın hava hücumlarının intensivləşəcəyi gözlənilir və bu, daha ağır nəticələrə səbəb ola bilər.

Pistorius Almaniyanın Ukraynaya neçə raket göndərəcəyini açıqlamayıb.

Almaniyanın müdafiə naziri bildirib ki, Berlin Ukraynaya digər növ raketlərin tədarükünü də artıracaq, həmçinin dronların və uzaqmənzilli döyüş sursatlarının göndərilməsini davam etdirəcək.

Qeyd edək ki, bundan əvvəl Ursula fon der Lyayen bildirib ki, Avropa İttifaqı Ukraynaya 90 milyard avroluq kreditin bir hissəsindən Amerika istehsalı „Patriot“ hava hücumundan müdafiə sistemləri üçün raketlərin alınmasına icazə verib.