ABŞ-ın Almaniyadakı hərbi kontingentinin bir hissəsini çıxarması gözlənilən idi, – bunu Almaniyanın müdafiə naziri bildirib.

Boris Pistoriusun sözlərinə görə, Avropada, xüsusən Almaniyada ABŞ hərbçilərinin olması hər iki tərəfin maraqlarına xidmət edir.

“Avropada, xüsusən Almaniyada amerikalı hərbçilərin mövcudluğu həm ABŞ-ın, həm də bizim maraqlarımıza xidmət edir”, – deyə Pistorius bildirib.

Almaniyanın müdafiə naziri qeyd edib ki, ABŞ-ın bu qərarı gözlənilən idi.

“ABŞ-ın Avropada, o cümlədən Almaniyada hərbi kontingenti azaltması gözlənilən idi. Son məlumatlara görə, söhbət təxminən 5 000 hərbçidən gedir, halbuki Almaniyada ümumilikdə təxminən 40 000 amerikalı hərbçi yerləşdirilib”, – deyə Pistorius vurğulayıb.

Bununla yanaşı, müdafiə naziri qeyd edib ki, Avropa öz təhlükəsizliyinə daha çox məsuliyyət götürməlidir.

“Avropa öz müdafiə imkanlarını gücləndirməli və təhlükəsizliyə daha çox məsuliyyət götürməlidir. Almaniya bu istiqamətdə düzgün yoldadır”, – deyə Pistorius əlavə edib.

Xatırladaq ki, ABŞ Müdafiə Naziri Pit Hegset Almaniyadan 5 000 amerikalı hərbçinin çıxarılması barədə əmri verib. Proses 6–12 ay ərzində başa çatacaq.

Qeyd edək ki, İranla davam edən münaqişə səbəbindən ABŞ Prezidenti Donald Tramp və Almaniya kansleri Fridrix Mers arasında gərginlik artıb. Almaniya kansleri tələbələrlə görüşdə bildirib ki, “Amerikalıların strategiyası yoxdur”, cavab olaraq Donald Tramp Fridrix Mersi “dəhşətli” adlandırıb və deyib ki, o, “heç nə başa düşmür”.