Beynəlxalq Mülki Aviasiya Təşkilatı – regional hava məkanının bəzi hissələrinin əlçatmaz olması səbəbindən uçuş marşrutları dəyişdirilir, Gürcüstanın hava məkanı mühüm alternativ tranzit dəhlizinə çevrilir
Beynəlxalq Mülki Aviasiya Təşkilatı (ICAO) – regional hava məkanının müəyyən hissələrinin əlçatmaz olması səbəbindən uçuş marşrutları Avrasiya şəbəkəsi üzrə dəyişir, nəticədə Cənubi Qafqaz regionu, o cümlədən Gürcüstanın hava məkanı mühüm alternativ tranzit dəhlizinə çevrilir.
Bunu Beynəlxalq Mülki Aviasiya Təşkilatının (ICAO) Avropa və Şimali Atlantika Regional Bürosunun direktoru Nikolas Rallo Gürcüstanın İqtisadiyyat və Davamlı İnkişaf Nazirliyinə göndərdiyi məktubda qeyd edib. O, Gürcüstanın həyata keçirdiyi səyləri xüsusi vurğulayıb.
“Gürcüstan tərəfindən həyata keçirilən, hava hərəkətində fasilələrin minimuma endirilməsinə, artan tələbatın ödənilməsinə və aviasiya təhlükəsizliyinin ən yüksək standartlarının qorunmasına yönəlmiş səylər ICAO-nun Avropa və Şimali Atlantika (EUR/NAT) regionunda yüksək qiymətləndirilir. Bu səylər Gürcüstanın beynəlxalq əməkdaşlığa və ümumi məqsədə – beynəlxalq hava nəqliyyatı sisteminin təhlükəsiz və səmərəli fəaliyyətinin təmin edilməsinə möhkəm bağlılığını nümayiş etdirir”, – ICAO-nun məktubunda qeyd olunub.
Nikolas Rallo Gürcüstanın hava naviqasiyası xidmətləri təminatçısı olan “Sakaeronavigatsia” MMC-nin operativ reaksiyasını, qonşu ölkələrin müvafiq qurumları ilə sıx koordinasiyasını, yüksək intensivlikli hava hərəkətinin effektiv idarə edilməsini və aviaşirkətlərlə proaktiv əməkdaşlığını xüsusi qeyd edib.
Bildirilib ki, bu amillər uçuşların fasiləsizliyinə və qlobal aviasiya təchizat zəncirinin dayanıqlığının qorunmasına töhfə verib.
Məlumatı “Sakaeronavigatsia” yayıb.
Məktubda qeyd olunur ki, beynəlxalq aviasiya bu gün artan hava hərəkəti, geosiyasi çağırışlar və hərbi münaqişələr fonunda xüsusilə mürəkkəb əməliyyat şəraitində fəaliyyət göstərir.
“Bu gün Gürcüstanın hava məkanı beynəlxalq hava əlaqələrinin qorunmasında və qlobal aviasiya şəbəkəsinin səmərəli fəaliyyətinin təmin edilməsində mühüm rol oynayır”, – məktubda bildirilib.