ABŞ Prezidenti Donald Trampla görüş Qəzzada olan girovların azad edilməsi səylərinə fokuslanmışdı – bu barədə İsrailin Baş naziri Benyamin Netanyahu deyib.

Netanyahu Ağ Evdə Donald Tramp və vitse-prezident Cey Di Vens ilə təxminən bir saat davam edən ikinci görüşü keçirib.

Netanyahu qeyd edib ki, İsrail Qəzzada olan bütün məqsədlərinə çatmaqda qərarlıdır.

“Biz bütün girovlarımızın, həm sağ olanların, həm də həlak olanların azad olunmasına; “HƏMAS”ın hərbi və idarəetmə imkanlarının məhvinə və Qəzzanın artıq İsrail üçün təhlükə yaratmamasını təmin etməyə nail olmalıyıq” – Netanyahu bildirib.

İsrailin Baş naziri bildirib ki, üç lider həmçinin İsrail və ABŞ-nin İrana qarşı birlikdə həyata keçirdiyi əməliyyatın “nəticələri və imkanlarını” müzakirə edib.