Benjamin Netanyahu, İsrailin baş naziri, İsrail hərbçisi tərəfindən Cənubi Livanda İsa Məsihin heykəlinin zədələnməsini “şiddətlə qınayıb”.

“İsraillilərin böyük əksəriyyəti bu hadisə barədə məlumat aldıqdan sonra şoka düşüb və kədərlənib”, – deyə Netanyahu sosial şəbəkədə yazıb.

Onun sözlərinə görə, hadisə ilə bağlı artıq araşdırma başlanıb və İsa Məsihin heykəlini zədələyən hərbçini ciddi intizam cəzası gözləyir.

“İsrail Yaxın Şərqdə hər kəsin dini azadlığını qoruyan yeganə yerdir. Hadisə və onun yaratdığı hər hansı ziyana görə təəssüf hissi keçiririk”, – deyə İsrailin baş naziri bildirib.

Xatırladaq ki, sosial şəbəkələrdə Cənubi Livandan yayılan fotoda İsrail hərbçisinin İsa Məsihin heykəlinə çəkiclə vuraraq onu zədələdiyi əks olunub.