Bələdiyyə İnkişaf Fondu Mğvimevi Qadın Monastırının ətraf ərazisində və Katsxi kəndində turizm-istirahət infrastrukturunun bərpası üçün tender elan edib

İnfrastruktur Nazirliyinin Bələdiyyə İnkişaf Fondu Ciatura Munisipalitetində turizm və istirahət infrastrukturunun bərpası üçün tender elan edib. Məlumatı Bələdiyyə İnkişaf Fondu yayır.

Onların məlumatına əsasən, tender layihə-smeta sənədinin hazırlanmasını və daha sonra qeyd olunan sənəd əsasında tikinti-bərpa işlərinin həyata keçirilməsini nəzərdə tutur.

Layihə Mğvimevi Qadın Monastırına gedən turizm və istirahət infrastrukturunun bərpasını, eləcə də Katsxi kəndində turizm infrastrukturunun qurulmasını əhatə edir.

Mğvimevi Qadın Monastırının ətraf ərazisində mövcud piyada cığırının və pilləkənlərin bərpası, təhlükəsizlik məhəccərlərinin quraşdırılması, monastıra qalxan metal pilləkənin bərpası, sanitar qovşaqların qaydaya salınması və istirahət zonalarının abadlaşdırılması planlaşdırılır.