BBC, İran mediasına istinadən, Tehranın hazırladığı atəşkəs üzrə 10 maddəlik planı yayımlayıb.

Plan Hörmüz boğazının açılmasını, İranın bərpası üçün xərclərin ödənilməsini və regionda bütün münaqişələrin başa çatdırılmasını nəzərdə tutur.

Eyni zamanda, plana əsasən, İran nüvə silahına sahib olmağa cəhd etməyəcəyini öhdəsinə götürür.

Konkret olaraq, plan aşağıdakı bəndlərdən ibarətdir: İraq, Livan və Yəməndə müharibənin tam dayandırılması; İrana qarşı müharibənin müddətsiz, tam və daimi dayandırılması; regionda bütün münaqişələrin tam başa çatdırılması; Hörmüz boğazının yenidən açılması; boğazda naviqasiya azadlığı və təhlükəsizliyinin təmin olunması üçün protokol və şərtlərin müəyyən edilməsi; İranın bərpası üçün xərclərin tam ödənilməsi; İrana qarşı sanksiyaların tam ləğvi öhdəliyi; ABŞ tərəfindən saxlanılan İran vəsaitlərinin və dondurulmuş aktivlərin azad edilməsi; İranın nüvə silahına sahib olmamaq öhdəliyi; qeyd olunan şərtlər təsdiqlənən kimi bütün cəbhələrdə dərhal atəşkəsin qüvvəyə minməsi.

Bundan əvvəl ABŞ prezidenti Donald Trump bildirib ki, Vaşinqton İran tərəfindən təqdim olunmuş 10 maddəlik təklifi alıb və bunu danışıqlar üçün əsas hesab edir. İran tərəfi isə qeyd edib ki, cümə günündən etibarən Pakistanın paytaxtı İslamabadda ABŞ ilə danışıqlara başlanacaq.