Geosiyasi gərginliyə və əlverişsiz şəraitə baxmayaraq, Gürcüstan xarici şokların öhdəsindən uğurla gəldi və makroiqtisadi sabitliyi qoruyub saxladı – bu haqda baş nazir İrakli Kobaxidzenin parlamentə təqdim etdiyi illik hesabatında qeyd olunub.

Sənəddə qeyd olunub ki, 2025-ci ildə Gürcüstan qlobal miqyasda 7.5% təşkil edən yüksək iqtisadi artımı ilə seçilib.

“2025-ci ildə ÜDM 104.6 milyard lari təşkil edib, adambaşına düşən ÜDM isə 28,235 lariyə – 10,297 dollara bərabər olub.

Yüksək iqtisadi artım 2026-cı ildə də davam edib və yanvar ayında 7.9%, fevral ayında 8.8%, mart ayında isə 10.7% real artım qeydə alınıb. Nəticədə, 2026-cı ilin birinci rübünün orta iqtisadi artımı 9.1%-ə bərabər olub. 2025-ci ildə iqtisadi artım kifayət qədər diversifikasiya olunmuşdu və informasiya və rabitə, təhsil, emal sənayesi, nəqliyyat və anbar təsərrüfatı, maliyyə və sığorta fəaliyyəti və digər xidmət sahələrində iqtisadi aktivliyin artması buna mühüm müsbət töhfə verdi. Daxili tələbat yüksəkdir və iqtisadi artımdakı ən mühüm töhfəni, güclü kredit aktivliyi və əməkhaqlarının artması fonunda illik müqayisədə 10.3% artan istehlak təmin etmişdir. İstehlakla yanaşı, xidmət ixracı da artım tendensiyası ilə xarakterizə olunur, bu da kompüter və informasiya xidmətləri ixracının, turizmdən əldə edilən gəlirlərin və nəqliyyat xidmətlərinin artması ilə bağlıdır” – sənəddə qeyd olunub.

Hesabatda Valyuta Fondunun proqnozundan bəhs edilir və deyilir ki, onların məlumatına əsasən, 2026–2031-ci illərdə Gürcüstan region və Avropa ölkələri arasında orta hesabla 5.1% olmaqla ən yüksək iqtisadi artıma sahib olacaq.

“2025-ci ildə orta illik inflyasiya 3.9% təşkil edib; 2026-cı ilin yanvarında inflyasiya 4.8% qeydə alınıb, apreldə isə 5.9%-ə qədər artıb. Onun 2026-cı ilin ortalarında mərhələli şəkildə hədəf səviyyəsinə qayıdacağı gözlənilir. İnflyasiya gözləntiləri sabitdir və yaxşı idarə olunur, buna da müvafiq monetar siyasət və fundamental makroiqtisadi amillər töhfə verir. 2025-ci ildə həm işsizlik, həm də məşğulluq səviyyəsi sabit səviyyədə qorunub saxlanılıb və müvafiq olaraq 13.9% və 46.9% təşkil edib” – hesabatda qeyd olunub.