Gürcüstanın Baş naziri İrakli Kobaxidze fevralın 11-13-də Birləşmiş Ərəb Əmirliklərinin Dubay şəhərində ev sahibliyi edəcəyi Dünya Hökumətlər Sammitində iştirak edəcək. Bu haqda məlumatı Hökumət Administrasiyasının mətbuat xidməti yayır.

Gürcüstan hökumətinin başçısı fevralın 11-də Dünya Hökumətlər Sammitinin iştirakçıları qarşısında çıxış edəcək.

Baş nazir vitse-baş nazir, iqtisadiyyat və davamlı inkişaf naziri Levan Davitaşvili, xarici işlər naziri Maka Bocorişvili, ədliyyə naziri Anri Oxanaşvili və Hökumət Administrasiyasının rəhbəri Levan Jorjolianidən ibarət nümayəndə heyəti ilə birlikdə Dubaya səfər edib.

“2025-ci ilin Dünya Hökumətlər Sammitinin əsas mövzusu “Gələcəyin Hökumətlərinin Formalaşdırılması”dır və onun altı mindən çox iştirakçısı var. Sammit beynəlxalq əməkdaşlığı təşviq etmək və çağırışların öhdəsindən gəlmək üçün innovativ yolları müzakirə etmək məqsədilə dünyada müxtəlif sahələrdən olan nümayəndələri bir araya gətirir. Onların arasında hökumət başçıları, beynəlxalq təşkilatların və özəl sektorun rəhbər şəxsləri, eləcə də aparıcı ekspertlər var. 2025-ci ilin sammitində 30-dan çox dövlət və hökumət başçısı, 80-dən çox beynəlxalq təşkilat və 140 ölkədən hökumət nümayəndə heyəti iştirak edir. 12-ci Sammitin proqramı 6 əsas tematik sahəyə yönəlib: effektiv idarəetmə və hesabatlılıq; Gələcəyin və qlobal iqtisadiyyatın maliyyələşdirilməsi; İqlim və davamlı şəhərlər; İnsan mərkəzli gələcək və potensialın inkişafı; Qlobal sağlamlıq transformasiyası; İnkişaf edən tendensiyalar və gələcək” – Gürcüstanın Hökumət Administrasiyasının məlumatında deyilir.