Balıq idxalının artması fonunda dövlət yerli istehsala dəstəyi gücləndirir

Akvakulturanın inkişafı məqsədilə dövlət yerli istehsala dəstək göstərir. Aqromaliyyələşdirmənin yeni proqramı həm mövcud şirin su akvakulturası və marikultura təsərrüfatlarının genişləndirilməsi və modernləşdirilməsini, həm də yeni təsərrüfatların yaradılmasını birgə maliyyələşdirməyi nəzərdə tutur.
Ətraf Mühitin Mühafizəsi və Kənd Təsərrüfatı Nazirliyinin məlumatına görə, dövlət dəstəyi Gürcüstanda yerli istehsal oluna bilən məhsulların istehsalının artırılmasına kömək edir. Lakin balıq bazarında idxalı tamamilə əvəz etmək mümkün olmayacaq. Çünki Gürcüstanda istehlak olunan balığın əhəmiyyətli hissəsi okean mənşəlidir.
Cari ilin yanvar-iyul aylarında Gürcüstana 11,0 min ton dondurulmuş balıq idxal olunub ki, bu da ötən ilin eyni dövrü ilə müqayisədə 1,4% çoxdur. İdxal olunan məhsulların ümumi dəyəri 37,6 milyon ABŞ dollarına çatıb.
Bununla yanaşı, bu il Atlantik qızılbalığı idxalı da artıb. Bu məhsul nisbətən yüksək qiymət seqmentinə aiddir və onun ümumi idxaldakı payının artması orta idxal qiymətinə də təsir göstərir.
Gürcüstanın balıq bazarı beynəlxalq bazarlarla əhəmiyyətli dərəcədə əlaqəlidir. Buna görə də balıq qiymətlərinə qlobal bazarda tələb və təklifin dinamikası, logistika xərcləri, təchizatçı ölkələrdəki vəziyyət və ayrı-ayrı balıq növlərinin beynəlxalq qiymətləri təsir göstərir.
İnformasiyanı Gürcüstan Ətraf Mühitin Mühafizəsi və Kənd Təsərrüfatı Nazirliyi yayıb.