Gürcüstanın İqtisadiyyat və Dayanıqlı İnkişaf Nazirliyinin Dağ Trassaları Agentliyi (MTA) Bakurianidə Koxta xizək zonasını 20 dekabrda açacaq.

Agentliyin yaydığı məlumata görə, Koxta Plato kanat yolu və xizək trassası hər gün saat 10:00-dan 17:00-dək xizək sürmək istəyənlərə xidmət göstərəcək.

Bununla yanaşı, agentlik bildirir ki, Didveli və Mitarbi xizək zonalarında süni qarlandırma işləri fəal şəkildə davam edir və trassaların mərhələli açılışı 27 dekabrdan planlaşdırılır. Gudauri, Mestia və Goderdzi kurortlarına gəlincə, kanat yollarının işə salınması 27 dekabrdan nəzərdə tutulur, xizək trassaları isə hava şəraiti və qar örtüyünün vəziyyətindən asılı olaraq mərhələli şəkildə açılacaq.

“27 dekabrdan Gudauri və Kobi kanat yolları – Birinci, Soliko, Gudauri, Kobi, Firni və Truso xətləri fəaliyyətə başlayacaq. Paralel olaraq süni qarlandırma işləri davam etdirilir və trassalar qar örtüyünə uyğun olaraq mərhələli açılacaq.

Elə həmin gündən Hatsvali xizək zonasında Zuruldi kanat yolu da işə salınacaq. Hatsvali və Tetnuldi xizək trassalarının açılışı hava və qar örtüyü şəraitinə uyğun olaraq mərhələli həyata keçiriləcək. Həmçinin, 27 dekabrdan Goderdzi kurortunda “Zanka” kanat yolu fəaliyyətə başlayacaq”, – deyə MTA-nın məlumatında bildirilir.

Agentliyin məlumatına əsasən, Bakuriani kanat yolları üçün abonementlərin alınması 20 dekabrdan etibarən kurortda yalnız Koxta kassasında mümkün olacaq, biletlərin onlayn satışı isə 23 dekabrdan başlayacaq və TKT.GE, BILETEBI.GE, SKIPASS.GE platformalarında, həmçinin Super App və MOUNT App tətbiqlərində əlçatan olacaq.

İstirahətçilər bu platformalar vasitəsilə Gudauri, Bakuriani, Mestia və Goderdzi kurortları üçün müxtəlif kateqoriyalı biletlər ala biləcəklər.

“2025–2026-cı illərin qış mövsümü Dağ Trassaları Agentliyi üçün xüsusi əhəmiyyət daşıyır, çünki Gürcüstan artıq üçüncü dəfə friraydin dünya turuna ev sahibliyi edəcək. Tədbir Svanetidə, Tetnuldidə 22–28 fevral tarixlərində (hava pəncərəsi çərçivəsində) keçiriləcək və burada 50 seçmə rayder iştirak edəcək. Gürcüstan friraydin dünya turunu keçirmək hüququ qazanmış altı aparıcı eksklüziv ölkə sırasındadır (Fransa, İspaniya, İsveçrə, Avstriya, ABŞ və Gürcüstan).

Bu tədbirin keçirilməsi Gürcüstanın dağ kurortlarının beynəlxalq tanınması, qış idman növləri və turizmin inkişafı baxımından olduqca önəmlidir. Ölkə artıq dünya idman xəritəsində layiqli yer tutub – əvvəlki illərdə Gürcüstan skikross, snoubord kross və mogul disiplinləri üzrə Dünya Kuboku mərhələlərinə uğurla ev sahibliyi edib. Friraydin dünya turunun keçirilməsi isə təkcə ölkənin tanınmasını artırmayacaq, eyni zamanda Gürcüstanın dağ-xizək kurortlarını qış idmanı həvəskarları üçün dünya xəritəsində bir daha ön plana çıxaracaq”, – deyə MTA-nın yaydığı məlumatda qeyd olunur.