Qeyri-legitim hakimiyyətin nümayəndələrinin xoşuna gəlsə də, gəlməsə də, bu gün Qərb dünyasının danışdığı ölkənin yeganə nümayəndəsi Salome Zurabişvilidir – bu haqda “Lelo-Gürcüstan naminə” partiyasının liderlərindən biri Badri Caparidze bildirib.

O, parlamentin qeyri-legitim olduğunu və müvafiq olaraq, qanunverici orqanın qəbul etdiyi qərarların qanunsuz olduğunu deyib.

“Bu gün 89 nəfər toplaşır və özünü parlament adlandırır. Onlar müxtəlif pafosla dolu adlar uydura bilərlər, lakin aydındır ki, qeyri-legitim seçkilər nəticəsində guya seçilmiş 89 nəfər parlament ola bilməz. Beləliklə, bu insanların verdiyi qərar aydındır ki, tamamilə qanunsuz və qeyri-legitimdir. Bu gün Qərb dünyasının danışdığı, prezidentlərin danışdığı ölkənin yeganə nümayəndəsi Salome Zurabişvilidir. “Gürcü Arzusu”nun qeyri-legitim hakimiyyətinin nümayəndələrinin bu xoşuna gəlsə də, gəlməsə də, vəziyyət, reallıq və fakt budur. Bir-birlərini həvəsləndirə, nazir, komitə sədrləri təyin edə bilərlər. Lakin bütün bunlar “fake” olacaq, çünki bu, qeyri-legitim hakimiyyət və parlamentdir” – Caparidze qeyd edib.