Türkiyə ilə Ermənistan arasındakı sərhəd Ermənistanda iyunun 7-nə planlaşdırılan parlament seçkilərindən və ölkədə konstitusiya dəyişikliklərinin qəbul edilməsindən sonra açılacaq. Bu barədə Azərbaycanın Türkiyədəki səfiri Rəşad Məmmədov Türkiyənin “Cumhuriyet” qəzetinə müsahibəsində deyib.

Səfir qeyd edib ki, Azərbaycan Türkiyə ilə daim təmasdadır və Ermənistan-Azərbaycan münasibətlərinin normallaşdırılması prosesi ilə paralel olaraq, Ermənistan-Türkiyə münasibətlərinin normallaşdırılması prosesinin də davam etdiyini bildirib.

Onun sözlərinə əsasən, iyunun 7-də Ermənistanda planlaşdırılan parlament seçkilərindən sonra konstitusiya dəyişiklikləri yolu ilə “Ermənistan Konstitusiyasının Azərbaycana qarşı ərazi iddialarını aradan qaldıracağı” gözlənilir.

Rəşad Məmmədov həmçinin bildirib ki, bundan sonra Azərbaycanla Ermənistan arasında ABŞ-da razılaşdırılmış sülh müqaviləsi imzalanacaq. Azərbaycanlı diplomatın sözlərinə əsasən, bu proses başa çatdıqdan sonra Ermənistan-Türkiyə və daha sonra Ermənistan-Azərbaycan sərhədləri də açılacaq.