Azərbaycan və Ermənistan Xarici İşlər nazirləri, Entoni Blinkenlə birlikdə sülh razılaşmasının hazırlanmasını müzakirə etdilər
Azərbaycan və Ermənistan Xarici İşlər nazirləri, ABŞ dövlət katibi ilə birlikdə sülh razılaşmasının hazırlanmasını müzakirə etdilər. Bu barədə məlumatı hər üç ölkənin Xarici İşlər Nazirliyi yayır.
Yayılan məlumata görə, danışıqların təşəbbüskarı ABŞ Dövlət Departamenti idi. Söhbət zamanı diplomatlar oktyabrın 2-də Cenevrədə keçirilən görüşün yekunlarına dair fikirlərini təqdim etdilər.
Ermənistan Xarici İşlər Nazirliyinin bəyanatına görə, söhbət zamanı həmsöhbətlər Ermənistan-Azərbaycan sülh müqaviləsinin inkişafı və Stepanakert ilə Bakı arasında müzakirə mexanizminin yaradılması ilə bağlı fikir mübadiləsi apardılar. Ermənistanın Xarici İşlər naziri, Ararat Mirzoyan Azərbaycanın silahlı qüvvələrinin Ermənistanın suveren ərazisindən çıxarılmasının, erməni hərbi əsirlərin dərhal vətənə qaytarılmasının və atəşkəs rejiminin qeyd-şərtsiz qorunmasının zəruri olduğunu bəyan etdi.
Azərbaycan Xarici İşlər Nazirliyinin məlumatına görə, nazir Ceyhun Bayramov “tərəflərin Cenevrə görüşündə rəsmi Bakının təklif etdiyi elementlər əsasında sülh müqaviləsinin mətni üzrə danışıqları davam etdirəcəyinə” ümid etdiyini bildirdi.
“Bayramov Azərbaycanın bölgədə sülhü təmin etməyə hazır olduğunu bəyan etdi və sülh müqaviləsi imzalamağa hazır olduğunu bir daha təsdiqlədi. Nazir onu da əlavə etdi ki, Bakı münaqişədən sonrakı dövrdə Azərbaycanın Qarabağ bölgəsində yaşayan erməni əhalinin reinteqrasiyası üçün fəaliyyətini davam etdirəcək”, – Azərbaycan Xarici İşlər Nazirliyinin bəyanatında deyilir.
Bununla yanaşı, ABŞ Dövlət Departamentinin bəyanatına əsasən, Entoni Blinken öz növbəsində Ermənistan və Azərbaycanın davamlı sülh razılaşmasının əldə edilməsi istiqamətində atdığı müsbət addımlara görə minnətdarlığını ifadə etdi.