İranın ruhani lideri Ayətullah Əli Xamenei deyir ki, İran–ABŞ danışıqlarının uğurla nəticələnməsində şübhələri var.

İranın sabiq prezidenti İbrahim Raisinin xatirəsinə həsr olunmuş mərasimdə çıxışı zamanı Xamenei bildirib ki, danışıqlar Raisinin prezidentliyi dövründə də nəticə verməyib.

“Dolayı danışıqlar hələ Raisinin dövründə keçirilirdi, lakin o zaman nəticəsi olmadı və düşünürəm ki, indi də olmayacaq, kim bilir. Bu dolayı danışıqlarda iştirak edən Amerika tərəfi çalışmalıdır ki, məntiqsiz sözlər söyləməsin,” – deyə Xamenei qeyd edib.

ABŞ və İran arasında danışıqların beşinci raundu bu həftə Romada keçirilməli olsa da, görüşün ləğv olunacağı ehtimalı var. İran Xarici İşlər Nazirliyindən verilən məlumata görə, Vaşinqton Tehrandan uranın yerli zənginləşdirilməsindən çəkinməsini inadla tələb etməyə davam edərsə, danışıqlar baş tutmayacaq.