Avtomobillərin idxalı, ilkin və müvəqqəti qeydiyyatı ilə bağlı tətbiq edilən yeni tənzimləmə elektromobillərə şamil edilmir. Bu barədə ətraf mühitin mühafizəsi və kənd təsərrüfatı nazirinin birinci müavini Nino Tandilaşvili bildirib.

Onun sözlərinə görə, avtomobil nə qədər köhnədirsə, mühərrik də bir o qədər köhnəlir və müvafiq olaraq ondan çıxan emissiyalar artır.

“Avro-5 standartı da on illik avtomobilə şamil olunur; on ildən sonra mühərrik elə köhnəlir ki, nə qədər yaxşı qulluq olunsa da, bu avtomobildən emissiyalar yenə də artır. Buna görə yaş məhdudiyyəti tətbiq edilib. Bu məhdudiyyət elektromobillərə şamil edilmir. Ölkədə avtomobil idxalında illik 25%-lik artım var və burada hibrid avtomobillərin payı artmır. Dizel və benzin mühərriki ilə işləyən avtomobillərin payı isə artır. Bu artım tendensiyası azaldılmalıdır ki, bu da sonda hava keyfiyyətinin vəziyyətinə təsir göstərsin. Avtopark mərhələli şəkildə yenilənəcək; bu yenilənmə isə öz növbəsində emissiyaları azaldacaq və nəticədə müəyyən yaxşılaşma əldə olunacaq. Bizim son məqsədimiz bir tərəfdən şəhərlərdə, yaşayış mühitimizdə hərəkət edə bilməyimizdir. Əgər nəqliyyat vasitələrinin sayını məhdudiyyətsiz artırsaq, bir gün fiziki olaraq hərəkət etmək mümkün olmayacaq. Digər tərəfdən isə əsas məqsədimiz hava keyfiyyətinin yaxşılaşmasıdır”, – Nino Tandilaşvili qeyd edib.

Hökumətin qərarına əsasən, Gürcüstanda 1 aprel tarixindən etibarən 6 ildən artıq yaşı olan M1 kateqoriyalı avtomobillərin idxalı, ilkin və müvəqqəti qeydiyyatı qadağan edilir.