Qrats şəhərində məktəbə edilən silahlı hücumla bağlı Avstriyada üç günlük matəm elan edilib.

Sabah, yerli vaxtla saat 10:00-da – hücumun baş verdiyi vaxtda – ölkə üzrə bütün ərazidə qurbanların xatirəsinə bir dəqiqəlik sükutla ehtiram göstəriləcək.

Daxili işlər naziri Gerhard Karnerin sözlərinə görə, son məlumatlara əsasən, hücum zamanı 9 nəfər həlak olub, 12 nəfər isə yaralanıb.

Hücum edən şəxs Qrats şəhərinin sakini, 21 yaşlı avstriyalı kişidir. O, həmin məktəbin keçmiş şagirdi olub, lakin təhsilini tamamlamayıb. O, hadisə zamanı məktəbin tualetində intihar edib.

Polisin verdiyi məlumata görə, hücum edən şəxs iki odlu silahla silahlanmışdı. Hüquq-mühafizə orqanları bildirir ki, o, hər iki silaha qanuni şəkildə sahib idi. Hücumun motivlərini müəyyən etmək üçün istintaq davam edir. Təhsil naziri Kristof Viderker bildirib ki, hücum baş verən məktəb müəyyən müddətə bağlanacaq.