ABŞ və İran arasında münaqişə ilə bağlı enerji daşıyıcılarının qiymətlərinin artması səbəbindən Avropa İttifaqı cari ildə 1,3 milyona yaxın iş yerini itirə bilər. Bu barədə Avropa Komissiyasının əmək məsələləri üzrə komissarı Roksana Minzatu bəyan edib.

“Yaxın Şərqdə davam edən müharibə səbəbindən 1,3 milyona yaxın iş yeri risk altındadır, xüsusilə də enerji tutumlu sektorlarda” – Minzatu mətbuat konfransında bildirib.

Avropa Komissiyasının qiymətləndirməsinə əsasən, ən irimiqyaslı ixtisarlar 600 000-ə yaxın iş yerinin təhlükə altında olduğu avtomobil sənayesində baş verə bilər.

Bundan başqa, tikinti, metallurgiya, kimya və nəqliyyat sektorlarında ümumilikdə 56 000 iş yerinin itirilməsi gözlənilir. Həmçinin batareya istehsalı və müvafiq layihələr sahəsində təxminən 85 000 iş yeri, günəş panelləri istehsalında 58 852 iş yeri, polad sənayesində əlavə olaraq 4 500 iş yeri risk altındadır.

Avropa Komissiyasının qiymətləndirməsinə əsasən, enerji resurslarının bahalaşması əhaliyə də təsir edəcək. Xüsusilə, azgəlirli ailələr nəqliyyat yanacağına orta hesabla 1,4% daha çox pul xərcləməli olacaqlar.