Avropa Komissiyası İspaniya hökumətinə miqrasiya böhranının öhdəsindən gəlmək üçün 114,7 milyon avro ayırıb

Avropa Komissiyası İspaniya hökumətinə miqrasiya böhranının öhdəsindən gəlmək üçün 114,7 milyon avro ayırıb. Avropa Komissiyasının bəyanatına görə, İspaniyaya yardım göstərilməsi “həmrəylik” aktıdır. Bu barədə “Euronews” məlumat yayıb.
“Bu maliyyə yardımı Avropa Komissiyasının ilk gündən göstərdiyi təcili dəstəyə əlavə olunur. Həmin vaxt biz İspaniyaya həm maliyyə, həm də operativ yardım təklif etmişdik. Bu, Avropa Komissiyasının İspaniyaya bu çətin vəziyyətin öhdəsindən gəlməkdə tam həmrəyliyini bir daha təsdiqləyir”, – deyə Avropa Komissiyasının bəyanatında bildirilib.

Medianın məlumatına görə, maliyyələşmə Sığınacaq, Miqrasiya və İnteqrasiya Fondundan ayrılacaq və bu fond 82,7 milyon avro təmin edəcək. Əlavə olaraq, sərhəd idarəçiliyi və viza alətindən 32 milyon avro ayrılacaq. Vəsait sərhəd nəzarətinin və mühafizəsinin, eləcə də təhlükəsizlik infrastrukturunun gücləndirilməsinə yönəldiləcək. Bunun üçün termal kameralar, monitorinq sistemləri və sualtı dronlar kimi avadanlıqlardan istifadə olunacaq.

Yardım, həmçinin əlavə personal və avadanlığın səfərbər edilməsinə, miqrantların yoxlanılması üçün zəruri infrastrukturun yaradılmasına və Seutada qanunsuz şəkildə qalan şəxslərin geri qaytarılması prosesinə dəstək göstərilməsinə imkan verəcək. Bu vəsait şəhərin miqrantların qəbul imkanlarının, o cümlədən müşayiətsiz yetkinlik yaşına çatmayan şəxslərə göstərilən qayğının gücləndirilməsinə də kömək edəcək.