Avropa Komissarı, nəqliyyat məsələləri üzrə Apostolos Tsitsipostas bildirib ki, Hörmüz boğazı yaxın gələcəkdə açılmazsa, bunun dünyaya fəlakətli nəticələri olacaq.

Bu barədə məlumat “Euractiv” yayıb.

Tsitsipostas qeyd edib ki, İranda davam edən münaqişə səbəbindən yaranan yanacaq çatışmazlığı bütün növ nəqliyyat vasitələrinə təsir göstərəcək.

Onun sözlərinə görə, “Avropanın bəzi bölgələrində kommersiya təyyarələri üçün nəzərdə tutulmuş yanacaq ehtiyatları təzyiq altında qalır”, lakin komissar əlavə edib ki, yanacaq çatışmazlığına dair “faktiki sübutlar mövcud deyil”.

“Avropada istifadə oluna biləcək fövqəladə ehtiyatlar var və lazım gələrsə onlardan istifadə edilə bilər. Hazırda bazar bu şoku dəf edə bilir”, – deyə komissar bildirib.

O əlavə edib ki, vəziyyət pisləşərsə, Avropa Komissiyası müvəqqəti olaraq öz qaydalarını da dəyişməyə hazırdır.

“Hörmüz boğazının blokadası sərt xəbərdarlıqdır ki, niyə alternativ yanacağa keçidi sürətləndirməliyik. Avropa İttifaqı enerji baxımından müstəqil olmalıdır”, – deyə Apostolos Tsitsipostas vurğulayıb.