Avropa İttifaqı və digər on dövlət, o cümlədən ABŞ, Böyük Britaniya, Andorra, Gürcüstan, İslandiya, Norveç, Moldova, San Marino və İsrail Avropa Şurasının Süni İntellekt və İnsan Haqları, Demokratiya və Qanunun aliliyi haqqında Çərçivə Konvensiyasını imzalayıb.

Avropa Şurasının saytında qeyd edildiyi kimi, bu, süni intellektdən istifadəyə dair məcburi hüquqi qüvvəyə malik olan ilk beynəlxalq müqavilədir. Süni intellekt sistemlərinin istifadəsini “insan haqları, demokratiya və qanunun aliliyinə tam uyğun” etmək məqsədi daşıyan sənəd imzaya açıqdır. Sənədin müəllifləri bildirirlər ki, saziş “süni intellekt sahəsində tərəqqi və innovasiyaları təşviq edəcək”, eyni zamanda süni intellektin yaratdığı təhlükələri idarə etməyə kömək edəcək.

Avropa Şurasının baş katibi Mariya Peyçinoviç-Buriç izah edib ki, süni intellektin inkişafı “standartlara uyğun olmalıdır və onları pozmamalıdır”.

Çərçivə konvensiyası Avropa Şurasının 46 üzv dövlətinin və üzv olmayan 11 dövlətin (Argentina, Avstraliya, Vatikan, İsrail, Kanada, Kosta Rika, Meksika, Peru, ABŞ, Uruqvay və Yaponiya) əməkdaşlığı ilə hazırlanıb. Sənəd həm dövlət, həm də özəl şirkətlər tərəfindən süni intellektdən istifadəni tənzimləyir və tərəfləri bu cür texnologiyalardan istifadə zamanı insan hüquqları standartlarına riayət olunmasını yoxlamağı və ya bu tələb təmin edilə bilmədikdə onlardan istifadəyə qadağa qoymağı öhdəsinə götürür.

Müqavilə həmçinin süni intellekt sistemlərinin demokratik təsisat və proseslərə, o cümlədən hakimiyyət bölgüsü, məhkəmə hakimiyyətinin müstəqilliyi və ədalət mühakiməsinə çıxış prinsiplərinə xələl gətirmək üçün istifadə edilməsinin qarşısının alınması üçün müəyyən tədbirləri nəzərdə tutur.

Martda konvensiya Avropa Parlamentinin deputatları tərəfindən, may ayında isə sənəd Avropa Şurasına üzv dövlətlər tərəfindən qəbul edilib.